DILI, STLTIMORLESTE.com – Konselhu Inan Aman Responsavel (KIAR) jere implementasaun programa merenda eskolar iha Pre Eskolar Sagrada Familia.
Kestaun nee hatoo husi membru KIAR iha Pre Eskolar Sagrada Familia Vila Verde, Joana da Costa ba STL iha nia knaar fatin Vila Verde, Dili, Segunda nee (28/10/2024).
“Programa nee ami mak jere, nee duni dader mai sedu, ami tein etu, naan no modo tahan ba ita nian estudantes sira, ami tein ho fehuk ropa, depois estudantes sira han hotu nee ami fo ho aifuan hanesan hudi ba ita nian estudantes sira, osan neebe ami uza ba tein hahan nee, nee hau nian mae mak foti,” dehan nia.
Nia hatete, estudantes neebe mak tama dader nee sira han tiha ona, agora sira prepara hahan ba sira neebe mak tama meudia ninia, kada loron sira tein tuir menu neebe mak iha ona, tanba menu nee taka tiha ona iha nee.
Nunee mos Koordenador Pre Eskolar Sagrada Familia Vila Verde, Cornelio A. Soares dehan, foin daudaun nee merenda eskolar para tiha, maibe agora lao fali ona, ohin ba loron rua ona, menu nee taka kedas iha dapur, para KIAR sira mak jere programa ida nee, total estudantes neebe asesu programa nee hamutuk 150.
Total estudantes 150 mak asesu ba programa merenda eskolar, nee kompostu husi zero boot no zero kiik.
(jac)
