BAUKAU, STLTIMORLESTE.com – Konselhu Kombatentes Libertasaun Nasional (KKLN) Munisipiu Baukau, keixa ona kompanhia lokal Planaltu Unip.Lda ba nasional, tanba laiha kuadru projetu estabele iha fatin projetu hodi la gatantia ba transparansia iha fatin projetu.
Kompanhia Planaltu Unip.Lda nuudar implementador ba projetu reabilitasaun eis edifisiu sede kolonial Português no Sede Komando Distrik Militer (KODIM) 1628 iha Baukau, neebe okupa husi batalhaun infantaria 315 utiliza ba sentru dadur, interogasaun, torturasaun nomos sai fatin ezekusaun ba gerilheiru Timoroan neebe luta ba ukun rasik aan iha tempu okupasaun Indonezia.
Nunee informasaun neebe STL rekolha uluk, iha loron 21 Fevereiru 2025, husi Sekretariu Konselhu Munisipal Kombatente Libertasaun Nasional Munisipiu Baukau, Manuel ‘Alari’ da Costa Soares katak, Governu liu husi Ministeriu Asuntu Kombatentes Libertasaun Nasional (MAKLN) aloka fundu husi Orsamentu Jeral Estadu (OJE) 2024 hodi reabilita eis edifisiu refere no planu sei atribui ba Konselhu Kombatentes Libertasaun Nasional Munisipiu Baukau utiliza ba asuntu servisu.
Tanba nee, ministeriu aloka orsamentu hamutuk rihun US$ 91 no selebra kontratu ho kompanhia Planaltu Unip.Lda hodi hahu implementa servisu iha fulan Julhu 2024 no tuir planu termina iha loron 30 Dezembru 2024.
Maibe liu husi observasaun STL nian iha terenu nota katak, projetu reabilitasaun refere parte kompanhia la estabelese kuadru projetu iha fatin projetu.
“Ami informa ba nasional, sira mak tenke sama atensaun ba kompanhia, ita haree fo hatene ba sira, sira tenke mai vizita,” hateten Sekretariu Konselhu Kombatente Libertasaun Nasional Munisipiu Baukau, Manuel ‘Alari’ da Costa Soares ba STL iha Vila Nova, Baukau, Kinta nee (27/03/2025)?
Nia agrumenta, durante nia parte halo obeservasaun ba projetu reabilitasaun edifisiu refere, parte kompanhia la estabelese kuadru projetu, maibe la.hatene razaun fundamentu husi asuntu nee.
Nunee parte Konselhu Kombatentes Libertasaun Nasional Munisipiu Baukau relata ona ba nasional atu foti medida hasoru kompanhia, tanba laiha kuadru projetu.
“Kaudru projetu nee koalia kona-ba transparansia, nee responsavel kompanhia nia tenke tau, se la tau nia tenke multa, nee regulamentu, neebe hau koalia ona sira nasional atu ezije kompanhia tenke tau kuadru,” Alari akresenta.
Tuir Sekretariu KKLN Baukau nee katak, parte kompanhia kontra regras transparansia, tanba la hatudu montante orsamentu, data kontratu hahu no remata ba publiku liu husi estabelese kuadru projetu, maibe halao deit servisu, tanba nee hatoo ona ba nasional, hodi ezije kompanhia, tanba tuir lei parte kompanhia tenke fo multa ba Estadu.
Nunee mos trabalhador iha fatin projetu la temi identidade hatete, projetu refere parte kompanhia liu husi trabalhador hahu sobu eis edifisiu refere iha fulan Agostu 2024 no kompanhia mobiliza kedas material servisu iha fatin hodi trabalhador sira utiliza ba servisu reabilitasaun, maibe durante nee laiha kuadru projetu ba projetu refere, tanba kompanhia implementador la estabelese.
“Ami mos servisu iha nee bingung tiha, tansa projetu boot hanesan nee kuadru la tau nee, maibe agora hotu ona hein entrega deit,” Katak trabalhador nee.
Trabalhador nee konta, durante nia parte servisu ho kompanhia seluk iha prosesu sira, iha kuadru projetu, nuneee durante servisu nia parte preokupa ho projetu reabilitasaun refere, tanba Governu kontratu ho orsamentu boot, maibe la estabelese kuadru projetu iha publiku.
Liga asuntu nee STL seidauk hetan konfirmasaun husi nain ba kompanhia, tanba laiha fatin projetu.
(tom)
