BAUKAU, STLTIMORLESTE.com – Konselhu Kombatentes Libertasaun Nasional (KKLN) Munisipiu Baukau husu kombatentes sira neebe rejistu iha tinan 2003, 2005 no 2009 la satisfas ho dedikasaun neebe iha, bele halo reklamasaun.
Prezidente KKLN Munisipiu Baukau, Fernando “Beredu’u” Gusmao esplika, iha loron 18 Marsu 2025 KKLN Munisipal simu informasaun husi nasional hodi orinta ba kombatentes neebe resjistu iha tinan 2003, 2005 no 2009 la satisfas ho atribuisaun sira bele hakbesik aan iha edifisiu KKLN munisipal hodi foti fixa halo reklamasaun.
“Hau husu ba kombatentes sira ida 2003, 2005 too 2009 nian seidauk mai karik rona avizu, koalia sai ona imi mai hadia lalais imi nia dadus, dia 17 Abril hotu ona,” hatete Beredu’u ba jornalista STL iha nia knaar fatin Vila Antiga, Kinta (03/04/2025).
Prezidente KKLN Baukau nee katak, tuir informasaun prolongamentu ba reklamasaun durante fulan ida, neebe hahu ona iha loron 18 Marsu no sei remata iha loron 17 Abril nee.
Tanba nee nia husu kombatentes sira tenke prosesu ona dadus hodi halo reklamasaun, maibe data prolongamentu remata, sei la simu tan dadus husi kombatente neebe hakarak submete dadus ba reklamasaun, tanba nee orientasaun.
Nia informa, KKLN Baukau hahu simu reklamasaun husi kombatentes sira, iha loron 18 Marsu too 02 Abril (horseik) simu ona reklamasaun husi kombatentes hamutuk nain 238 no sei kontinua simu too loron 17 Abril nee.
“238 nee seidauk hotu, sira sei mai nafatin, iha Baukau ema nain hira mak atu halo reklamasaun karik ami la konta, maibe mai ona ami simu mak aponta,” nia argumenta.
Beredu’u hatete, husi dadus 2003, 2005 too 2009 kombatentes hira mak la satisfas ho dedikasaun neebe Estadu Timor Leste atribui nia parte seidauk hatene, maibe atu hatene bainhira loron prolongamentu remata ona, tanba daudaun sei iha faze simu dokumentus.
Entretantu lista edital 2025 husi kombatentes neebe rejistu iha tinan 2009 iha Munisipiu Baukau hamutuk rihun 10 resin, kompostu dedikasaun eskluzivu ho 24 anos, 15a19 no 8a14 hamutuk 319, no hirak neebe halo reklamasaun husi dedikasaun eskluzivu 3a7 hamutuk nain 4.401, enkuantu 0a3 rejistu hamutuk nain 5.991 no KKLN Baukau submete ba nasional iha loron 18 Marsu 2025 hamutuk 8.620, maioria husi dedikasaun 0a3 no 3a7.
(tom)
