BAUKAU, STLTIMORLESTE.com – Konselhu Kombatentes Kombatentes Libertasaun Nasional (KKLN) inaugura sede Kombatentes Munisipal Libertasaun Nasional (KMKLN) iha Munisipiu Baukau, tanba nee sei esforsu atu responde kondisaun infraestrutura Sede KMKLN iha munisipiu seluk.
Segundu Visi Prezidente KKLN, Marito Reis hateten, reabilita Sede Konselhu Munisipal neebe inaguradu, sei fasilita liu tan servisu atendimentu kombatente no veteranu kona-ba trara dokumentu bainhira presiza, tanba iha ona espasu, maibe iha Munisipiu seluk Sede Konselhu barak mak seidauk hetan konstrusaun no reabilitasaun.
“Esforsu mak Munisipiu hotu-hotu iha sede, para hodi halo atendimentu diak, tanba sede laiha sira labele halo atendimentu, neebe ami hakarak tinan ida nee Munisipiu hotu tenke halo reabilitasaun hotu,” hateten Marito Reis iha Vila Antiga, hafoin inaugura Sede KMKLN, Baukau, Sesta (11/04/2025)
Nia sublina, Munisipiu seluk neebe Sede KMKLN seidauk konstrui no reabilita, mak hanesan Munisipiu Kovalima, Same, Ermera, Likisa no seluk tan, maibe KKLN sei esforsu hodi apoiu konstrusaun ba Munisipiu neebe seidauk iha Sede no reabilita ba Munisipiu neebe iha ona Sede.
Nia fundamenta, Sede importante ba KMKLN sira iha kada Munisipiu, nunee tenke konstrui no reabilita hodi atendimentu diak liu tan, liu liu bele utiliza ba validasaun dadus rejistu 2009 nian.
Nunee nia husu KMKLN Baukau atu kuidadu edifisiu reabilitasaun neebe atribui ona, hodi bele utiliza ba tinan naruk.
Prezidente Konselhu Munisipal Kombatentes Libertasaun Nasional Baukau, Fernando “Beredu’u” Gusmao agradese ba apoiu husi Konselhu Kombatentes Libertasaun Nasional neebe inisia kontratu kompanhia hodi reabilita edifisiu ba konselhu Munisipal.
“Ami nia sede prontu ona ami kontente, hodi bainhira iha sorin nee, ami sena malu hamutuk iha kuartu ida, maibe agora fatin ida nee luan ona,” hateten Beredu’u
Prezidente KMKLN Baukau nee katak, edifisiu foun refere bele fasilita ona atendimentu servisu, tanba edifisiu tuan difikulta servisu kauza husi medida kloot.
Enkuantu Diretor kompanhia Konstrusaun Planalto Lda, Satornino Cabral agradese ba Konselhu Kombatentes Libertasaun Nasional, tanba fo fiar ba kompanhia hodi implementa projetu too finiliza ho kualidade tuir dezenhu neebe tekniku husi Konselhu Kombatentes Libertasaun Nasional prepara.
Nia konta, kompanhia liu husi trabalhador hahu servisu iha fulan Julhu 2024, no tuir planu remata fulan dezembru tinan 2024, maibe iha adisional balun neebe prezisa kompanhia aumenta nunee finaliza iha fulan Marsu 2025.
“Too iha nee, ami kompanhia hatoo ami nia deskulpa ba servisu neebe ami halo la tuir tempu neebe determina iha kontratu,” nia argumentu.
Diretor nee konta, projetu reabilitasaun sede konselhu Munisipal Baukau finansia orsamentu husi konselhu Kombatentes Libertasaun Nasional hamutuk rihun US$ 92,833.00 kompostu valor kontratu US$ 87,620.89 no adisional rihun US$ 5,221.12.
Nia katak, bazeia dezenhu neebe tekniku husi KKLN aprezenta parte kompanhia ezekuta tuir, maibe iha parte balun aumenta, tanba nuudar Baukau Oan prontu atu koopera.
“Ami sente buat neebe ami halo bele fo satisfasaun ba ami nia inan aman veteranus sira husi Munisipiu Baukau,” nia hatoo.
Aleinde mos nain kompanhia husu deskulpa, tanba durante projetu reabilitasaun lao, maibe la tau kuadru projetu iha publiku, tanba haluha.
Entretantu seremonia inagurasaun Sede KMKLN Baukau nee, hetan partisipasaun masimu husi kombatente no veteranu sira iha Baukau, inklui autoridade sivil no militar.
(tom)
