BAUKAU, STLTIMORLESTE.com – Ekipa husi Konselhu Kombatentes Libertasaun Nasional (KKLN) hamutuk ho Konselhu Munisipal re-verifika dadus veteranu no kombatente rejistradu iha tinan 2003, 2005 no tinan 2009 nian neebe antes nee halao kontestasaun iha Munisipiu Baukau.
Prezidente KMKLN Baukau, Fernando “Beredu’u” Gusmão esplika, re-verifikasaun refere bazeia ba despaisu husi Ministeriu Asuntu Kombatentes Libertasaun Nasional (MAKLN) mak Konselhu Kombatentes Libertasaun Nasional hamutuk ho Konselhu Munisipal halo re-verifikasaun ba veteranus no kombatente sira neebe rejistu iha tinan 2003, 2005 no tinan 2009 iha Munisipiu Baukau, neebe antes nee submete ona karta kontestasaun ba Konselhu Kombatentes Libertasaun Nasional, tanba la satisfasaun ho dedikasaun neebe Governu atribui.
“Agora Konselhu Veteranus halo re-verifika dadus 2009, 2003 no 2005 nian, 2003 no 2005 nian neebe uluk pendente nee mos hamutuk ho 2009 nian. Dadus agora nee 6.735 mak agora iha nee, maibe tekniku sira sei haree,”dehan Beredu’u ba jornalista sira, iha Vila Antiga, Baukau, Segunda (13/10/2025).
Verifikasaun uluk tuir nia perguntas husi verifikador sira hafoin prense iha formulariu, maibe bainhira taka sai naran kombatentes no veteranus barak halo kontestasaun, tanba la satisfas ho dedikasaun neebe Governu atribui.
Nunee veteranu no kombatentes hirak nee ida idak halo kontestasaun hanesan kombatente neebe hetan dedikasaun 3a7, 0a3 hakarak hetan 8a14 no veteranus balu hakarak hetan 15a19, tanba nee atu re-verifika hikas molok hakat ba prosesu pagamentu, maibe re-verifikasaun refere, Kombatentes no Veteranus tenke aprezenta testamunha no responsabilidade sira.
“Presiza testamunha nain 2, prezisa responsabilidade akompanha, maibe ema ida neebe ferik katuas ona lahatene lao labele mai nia responsabilidade deit mak mai,” katak Beredu’u.
Prezidente Konselhu Kombatentes Baukau nee informa, re-verifikasaun nee ho durasaun tempu fulan ida hahu husi loron 13 Outubru nee too remata, maibe tenke hatudu provas, tanba iha karta kontestasaun, kontestante sira mak hakerek rasik.
“Iha karta kontestasaun sira mak hakerek rasik, maibe ami sei haree sira hakerek nee, baze apoiu nee tinan 3 fulan 4, baze apoiu rahun tun mai Matebian okos nee se fulan ida entaun tinan 3 fulan 5, se tinan 1 entaun tinan 4 fulan 4, se tun mai vila kastigu karik tinan hira, se kastigu konta hamutuk ho baze apoiu, se destera tan ida nee mak foin tama dedikasaun eskluzivu, se klandestina deit ida nee partisipasaun, nee labele dedikasaun simu 8a14,” Beredu’u informa.
Entretantu tuir observasaun jornalista STL nian iha terenu nota katak, veteranu no kombatente barak mak prenzensa iha edifisiu Konselhu Kombatentes Munisipiu Baukau, maibe seidauk loron 13 Outubru nee seidauk iha atendimentu, tanba sei halo preparasaun no atendimentu sei efitivu iha loron 14 Outubru 2025 nee too remata.
Jornalista: Tomas Reis
Editora: Carme Ximenes
