BAUKAU, STLTIMORLESTE.com – Autoridade Munisipiu Baukau realiza reuniaun ordinaria Konselhu Koordeansaun Munisipal (KKM) Baukau, iha diskute ajenda importante 2.
Deklarasaun nee hatoo husi Prezidente Autoridade Munisipiu Baukau, Veneranda Lemos ba jornalista sira, hafoin remata reuniaun ho membru KKM sira iha salaun apuramentu Vila Nova, Baukau, Segunda (05/01/2026).
“Reuniaun ohin nee ordinaria Konselhu Koordeansaun Munisipal, iha reuniaun nia laran aprezenta deit Planu Dezenvolvimentu Munisipal 2025-2030, iha planu ida nee halo aprezentasaun para hotu hotu fo nia hanoin oinsa mak planu dezenvolvimentu nee implementa ho diak, fo benefisiu ba povu no ida fali mak dileberasaun lista naran Suku no Aldeias nian,”dehan nia.
Prezidente Autoridade Munisipiu Baukau nee katak, durante reuniaun ordinaria iha Konselhu Koordeansaun Munisipal parte tekniku aprezenta Planu Dezenvolvimentu Munisipal tinan 2025-2030 nian, neebe simu opinioes hotu husi membru KKM sira nunee implementasaun planu refere ho diak no fo benefisiu ba komunidade sira.
Nunee mos iha reuniaun refere KKM mos diskute atu halo koresaun ba naran Suku no Aldeia sira hotu iha Munisipiu Baukau atu nunee labele failha iha sistema, tanba dala ruma naran Suku nian iha sistema laran hakerek ida, maibe depois entidades sira husi Suku submete dokumentus la hanesan naran neebe antes iha ona sistema laran hodi difikulta prosesu sira.
Nunee desde fulan Dezembru 2025, ekipa husi Diresaun Nasional sira kobre ona Munisipiu hotu fo hikas fali lista naran Suku no Aldeia ba kada Autoridade Suku no Aldeia, hodi verifika no haloos ho adekuadu hafoin submete hikas ba sistema hodi la difikulta prosesu sira.
“Neebe ohin ami halo diliberasaun ba ida nee ho korekasaun, husu nafatin lista sira neebe iha tiha ona ohin lista nee ami fo fila ba Administrador do Postu no Xefe Suku sira atu lori ba kada Suku no Aldeia halo komfirmasaun loloos nunee semana ida nee nia laran ami bele submete ona ba Nasional,” hatete Veneranda.
Entretantu tuir observasaun jornalista STL nain iha reuniaun nee nota katak, membru KKM sira hanesan Xefe Suku balu la marka prezensa.
Jornalista: Tomas Reis
Editora: Carme Ximenes
