DILI, STLTIMORLESTE.com – Koordenador Gabinete Avaliasaun Lisensiamentu no Akreditasaun (GALA), Antonio Tomas Maia hatete, paralelu hanesan estensaun klase, ida nee jestaun iha eskola sentral sira mak haree ba paralelu sira nee.
“Paralelu nee estensaun klase, ida nee jestaun interna iha eskola sentral, sira mak haree kona-ba kestaun ida nee, depois iha koordenasaun servisu hamutuk ho Edukasaun Munisipiu nomos ho diresaun nível eskolaridade relevante sira atu haree ba asuntu ida nee, tanba GALA nian foka liu ba ita nian eskola sira,” dehan Antonio ba STL iha nia knaar fatin, Segunda nee (21/04/2025).
Nia hatutan, klase paralelu nee estensaun klase deit, nee halo hodi fasilita klase ba estudante. Klase paralelu nee kabe kompetensia eskola sentru sira. Nee duni ami la halo monitoring ba eskola lisensiadu sira, tanba ida nee kabe ba eskola sentru sira no sira la halo monitoring ba klase paralelu sira.
Iha sorin seluk, Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandes hatete, eskola neebe estatutu filial labele iha tan paralelu ida no bazeia ba lei 33/2023 nee hatete katak, eskola nee ninia klase paralelu nee haree ba iha distansia besik.
“Eskola neebe estatutu filial labele iha tan paralelu ida no bazeia ba lei 33/2023 nee hatete katak, eskola nee ninia klase paralelu nee haree ba iha distansia besik mak ida nee,” nia hatete.
Iha fatin seluk, Diretor Servisu Edukasaun Munisipiu Ainaro, Patricio da Costa Magno hatete, agora daudaun nee klase paralelu iha Munisipiu Ainaro ensinu baziku 11, ensinu sekundariu jeral tolu no tekvo nee iha ida.
Entretantu Diretor Servisu Edukasaun Munisipiu Likisa, Julio da Silva hatete, paralelu iha Munisipiu Likisa haat, nee nível sekundariu hotu, atu taka la prienxe kriteria oinsa, tanba paralelu sira nee iha tinan kotuk estudantes sira partisipa iha ezame nasional lao ho diak.
(jac)
