KELIKAI ANTIGA, STLTIMORLESTE.com – Kliente Eletrisidade Timor Leste, Empreza Publika (EDTL, E.P) iha Bairu Inaboba, Aldeia Uligata, Suku Afasa, Postu Administrativu Kelikai Antiga, Munisipiu Baukau, kontribui osan hodi sosa fiu ho total orsamentu rihun US$ 5 halo instalasaun ba distansia kilometru 4 neebe rin utiliza deit ai, maibe parte EDTL monta ona prepagu, tanba nesesidade.
Kliente Sebastião Ximenes haktuir, iha tinan 2012 Komunidade Suku Afasa konsege asesu eletrisidade primeira vez, neebe ekipamentu eletrisidade nian hanesan fiu, lampu no seluk Governu oferese liu husi kompanhia instalasaun distribui ba kada uma kain ho gratuita, maibe uniku komunidade Aldeia Uligata Bairu Inaboba la konsege asesu eletrisidade, tanba la hetan instalasaun.
“Durante nee ami insiativa rasik dada eletrisidade husi Sede Suku Afasa nian mai area Inaboba gasta orsamentu rihun US$ 5, tanba distansia dook, maibe ninia riin nee ami uza deit ai no ai, EDTL sira mai monta deit prepagu, ami pasiensia simu deit ona,” hatete Sebastião ba jornalista sira iha Uligata, Segunda (29/12/2024).
Tanba tuir nia, instalasaun eletrisidade nee inisiativa husi komunidade sira liu husi kobra malu hafoin sosa ekipamentu sira hanesan fiu no seluk tan ho montante orsamentu rihun US$ 5, hodi simu enerjia eletrisidade husi instalasaun EDTL nian iha area Sede Suku Afasa too area Inaboba neebe fiu eletrisidade obrigatoriu tenke dada husi ai leten, tanba laiha riin eletrisidade husi EDTL.
Maibe hafoin komunidade sira remata instalasaun iha kada uma kain, parte EDTL too kedas fatin monta prepagu, nunee bele kontribui reseita ba kofre estadu liu husi sosa saldo eletrisidade nian.
Kliente nee mos rekonhese, dada fiu liu husi ai leten fo risku ba ema nia vida, tanba anin boot fasil liu fiu bele kotu no tempu udan bele hamate ema, bainhira fiu neebe iha ai leten kanek, bele hamosu sirkuitu liu husi udan been.
Atu la hamosu risku eletrisidade nian ba komunidade sira, tanba problema hotu liu husi Suku hatoo ona ba parte EDTL, atu harii riin eletrisidade, maibe laiha solusaun, tanba nee husu nafatin atu responde nunee bainhira tempu anin boot no udan labele hamosu impaktu ba komunidade.
Hatan ba kestaun nee, Supervisor EDTL.EP Munisipiu Baukau, Edgar da Silva rekonhese kliente sira iha area refere utiliza deit ai no au hodi satan fiu, tanba parte EDTL seidauk apoiu riin eletrisidade hodi troka ai no au sira neebe kliente sira tau.
“Bazeia ba sira nia pedidu ami hamutuk ho nasional no Xefe Suku sira foti ona dadus, prosesu lao nafatin iha nasional,” nia informa.
Edgar akresenta, bazeia ba preokupasaun kliente sira husi aldeia refere parte EDTL hamutuk ho nasional inklui Lideransa Komunitariu rekolha ona dadus no relata ba nasional, maibe atu hetan resposta sedu no tarde, seidauk iha informasaun, tanba kompetensia tomak iha nasional.
Maibe dada fiu liu husi ai no au leten nee fo impaktu ba komunidade sira nia vida, tanba bainhira mosu anin no udan boot ai bele tohar no fiu bele monu, maibe too oras nee seidauk afeta ba komunidade balun.
Tanba nee husu kliente sira atu pasiensia hein, bainhira husi nasional loke ona ba konkursu publiku, parte kompanhia manan nain sei rezolve.
(EST 2)
