DILI, STLTIMORLESTE.com – Kliente husi Banku Nasional Komersiu Timor Leste (BNCTL – sigla português), neebe sira nia kartaun ATM expira ona, liu-liu sira neebe hela iha Munísipiu Dili oras nee daudaun mai renova iha Sukursal Golgota, Tasi-Tolu.
Tuir Kliente Veronica da Silva katak, nia parte mai tur forma iha BNCTL Golgota nian iha kedas dadersan hodi renova fali nia kartun ATM neebe mak expira ona iha tinan kotuk. Neebe tama ba tinan foun nee tenke renova fali para bele asesu salariu mensal nian husi makina ATM deit.
Nia hatete, kartaun ATM nee tenke mai renova duni fali, para nunee bele fasilita kliente sira ho fasil asesu makina ATM.
“Ho kartaun ATM nee hafasil liu hau bele foti osan tuir tempu saida deit hau hakarak. Hau bele foti dadersan, loraik no kalan fali mos diak. Neemak Ita hotu hakarak atu uza kartaun ATM nee,” dehan nia bá STL iha Golgota, Kuarta (07/01/2026).
Nia hatutan, renova kartaun ATM nee hahu kedas iha Segunda (05/01/2026), ohin tama bá loron 3 ona. Ohin loron ema menus ona, iha Segunda ho Tersa neemak ema barak.
Nunee mos Seguransa BNCTL Sukursal Golgota neebe lakohi temi naran dehan, kliente sira neebe mak atu renova fali sira nia kartaun nee nafatin mai hela iha nee, hahu kedas iha loron Segunda too ohin sira sei nafatin mai halo.
Nia dehan, bá sira neebe mak mai forma mais haree bá atu meudia ona no oras deskansa nian, bele fo hela kartaun eleitoral tahan 1 bá nia, nunee mai fali iha oras tuku 1 ho balun ka tuku 2 sira bolu naran tama liu bá laran hodi halo deit ona.
Nunee mos Kliente Juli da Costa hatete, nia parte iha Segunda nee bá forma iha BNCTL Obrigado Barak nian, maibe staff sira dehan bá nia, atu renova kartaun ATM ba deit iha BNCTL Golgota nian. Nunee nia mai kedas iha Golgota, maibe ema forma barak los. Neemak ohin nia foin mai forma hodi renova fali nia kartaun ATM nee.
“Hau tenke renova fali hau nia kartaun ATM, para bele hafasil hau foti osan iha makina ATM nian,” dehan nia.
Jornalista: Domingas Gomes
