BAUKAU, STLTIMORLESTE.com – Klubu Futsal hamutuk 24 hahu kompete ona iha tasa rotativa simples Cup neebe realiza iha kampu futsal Batalhaun Ordem Publiku (B.O.P) Baukau.
Prezidente Komisaun Organizadora ba Tasa Rotativa Simples Cup, Isaías de Jesus da Costa esplika, objetivu husi jogu Tasa Rotativa Simples Cup mak atu halibur komunidade sira no promove juventude talentu futebol sira atu evita aktus violentu no promove pas no estabilidade iha Munisipiu Baukau.
“Klubu neebe kompete iha Tasa Rotativa Simples Cup ida nee hamutuk 24 jogu nee kompetisaun full, juventude neebe mai kompete iha jogu ida nee balu mai husi suku no balu mos mai husi postu,” Isaías hateten ba jornalista sira hafoin remata sesaun abertura ba jogu Tasa Rotativa Simples Cup neebe realiza iha kampu futsal B.O.P Baukau, Segunda (05/01/2025).
Nia informa, orsamentu neebe aloka ba realizadu jogu refere apoiu husi masimu husi emprezariu CK Simples Motor, DB Ingracias, inklui mos apoiu husi empreza LZP, Always Constraction no East Timor Tranding neebe durante nee servisu diak ho empreza Simples.
Nia katak, iha prosesu administrasaun kada klubu rejistu ho valor orsamentu US$ 100 neebe aumenta apoiu husi emprezariu sira ba realizadu jogu refere ho valor orsamentu hamutuk rihun US$ 5 neebe orsamentu balu alokadu ba preparasaun no klubu vensedor inklui mulhor markador no jogador.
“Ekipa neebe sai vensedor primeiru lugar hetan osan US$ 1.000, segundu lugar US$ 700 no terseiru lugar hetan US$ 500, aleinde mos iha premiu ba mulhor markador ho osan US$ 50, nomos US$ 50 ba mulhor jodador no gurda rede,” tenik Isaías.
Iha fatin hanesan, reprezentante klubu 24, treinador husi Klubu Wabubu F.C, Moises Fernandes Baptista sente kontente no agradese ba empreza Simples, tanba durante tinan 2025 Munisipiu Baukau laiha liga futebol, maibe empresa Simples bele inisia jogu refere hodi promove joven futebolista sira iha Baukau.
“Hau agradese tebes tanba Simples iha hanoin bele akumula ami joven sira tuir torneiu ida nee. Ami nia preparasaun ba torneiu ida nee masimu ona, tanba durante nee ami treina ona garante sei foti tres pontus ida,” Moises argumentu.
Treinador nee garante sei lori Klubu Wabubu too iha faze terseiru lugar, maibe laos terseiru lugar mak sai prioridade ba Klubu Wabubu, tanba jogu refere objetivu atu promove pas no garante estabilidade iha Munisipiu Baukau, nunee hakarak hatudu kapasidade jogadores sira nia jogu iha kampu laran ba atinji planu neebe Klubu Wabubu trasa ona.
Enkuantu Segundu Komadante Komando Polisia Munisipiu Baukau, Superintendente Asistente Fasiu de Jesus Lima enkoraja jogadores sira atu hatudu joga ho kapasidade no responsabilidade liu liu evita dezentendimentu iha kampu laran no kumpri ba regras neebe komisaun organizadora estabelese, tanba objetivu ba jogu refere klaru.
“Eventu jogu ida nee nia objetivu esplika klaru ona katak atu kria amizade pas entre juventude ho juventude entre juventude ho inan aman, nee objetivu ida neebe mais importante hodi bele kria ambiente neebe pas, se kuandu ita hamosu fali konflitu entaun objetivu nee ita la alkansa, tanba desportu nee importante tebes iha nasaun ida idak nian kuandu nee la dezenvolve ita la kria ambiente pas no armonia mak ita sei la kontinua jogu sira nee,” Katak Fasiu.
Entretantu iha abertura jogu Tasa Rotativa Simples Cup aberta husi reprezentante Komadante Komando Polisia Munisipiu Baukau, reprezentante Komadante B.O.P Baukau, reprezentante Komadante Komponente Forsa Terrestre Lanud Baukau, reprezentante Autoridade Suku Tirilolo, nain ba empreza Simples no seluk tan neebe iha abertura jogu refere kompete husi Klube Wabubu FC ho Matano FC hetan partisipasaun masimu husi nia adeptus sira husi klubu rua refere.
Jornalista: Tomas Reis
