BAUKAU, STLTIMORLESTE.com – Klubu Futebol Fitun Matebian Sporting Baukau ofisialmente reativa atividades desportu hafoin para tinan 20 iha area desportiva.
“Saudasaun desportiva ba familia boot Fitun Matebian Sporting Baukau iha rai liur no rai laran, deklara ba publiku katak, Sporting Baukau hahu reativa fali nia atividade futebol nian hahu ho treinu atu bele kompete iha nivel munisipal, rejional no nasional,” deklarasaun nee hatoo husi Prezidente Klubu atual, Padre Julio Crispin ba jornalista sira iha Vila Antiga, Sabadu (22/02/2025).
Prezidente Klubu nee esplika, Klubu Fitun Matebian Sporting Baukau hahu para atividade desportiva hafoin sai Primeiru Lugar manan taxa rotativa independente iha liga Prezidente Republika neebe halakon Klubu Esperansa iha tinan 2005 no la kontinua atividade desportu, tanba kauza husi jogador sira inkomoda ho atividade eskola no balu ba buka servisu no buka esperiensia tuir formasaun treinador joga nian iha rai liur.
Nia sublina, mezmu durante tinan 20 Klubu Fitun Matebian Sporting Baukau la halo atividade desportivu hodi kompete ho Klubu Nasional sira iha liga rai laran, maibe nafatin iha komitmentu, tanba inisiu tinan 2025 fulan Janeiru liu ba liu husi enkontru deside no reafirma ezistensia Klubu Fitun Matebian Sporting Baukau mantein no reativa atividade desportu hanesan futebol hodi kompete iha nivel munisipal, rejional no nasional.
“Balu neebe ba servisu no balu ba eskola agora mai hamutuk fali ona, ami hamutuk nafatin hanesan uluk halo deklarasaun ba reativasaun prepara jogadores husi kraik mak sae,” Julio Crispin fundamenta.
Prezidente Klubu nee akresenta, prosesu reativa Klubu Fitun Matebian Sporting Baukau iha espektativa sei avansa ho jogador junior ho idade husi 13-19 hafoin halo selesaun hodi forma jogador kompete iha kompetisaun sira.
Kona-ba treinador Klubu Fitun Matebian Sporting Baukau garante, tanba hafoin para atividade desportu, iha pesoal jogador nain 6 konsege hasai tan sertifikadu treinanador nian iha rai liur neebe prontu apoiu treinador junior sira hodi avansa Klubu Sporting Baukau ba futuru neebe kualidade.
Mezmu daudaun Klubu Sporting Baukau rasik seidauk iha jogador junior, maibe sei simu jogadores foun iha tempu besik, tanba foin deklara ba publiku kona-ba reativa klubu refere.
Bainhira simu ona jogadores foun, parte estrutura klubu sei koalia ho Diretor Eskola Katolika Ensinu Sekundaria Santo Antonio (ESSA) hodi utiliza kampu Futebol Teulale sai fatin treinu jogador Sporting Baukau nian, tanba inisiu tinan 1986 Klubu refere eziste, utiliza kampu Futebol Teulale sai fatin ba treinu tatika jogu nian.
(EST 2)
