DILI, STLTIMORLESTE.com – Konselhu Ministru (KM) apoia akordu ho Banku Dezenvolvimentu Aziatiku (ADB) kona-ba hadia reziliénsia no meius subsisténsia iha setór rurál.
Konselhu Ministru endosa akordu ho ADB, kona-ba medida sira ba hadia reziliénsia no meius subsisténsia iha setór rurál.
Programa nee aprezenta husi Visi Primeiru Ministru no Ministru Dezenvolvimentu Rurál no Habitasaun Komunitária, Mariano Assanami Sabino, iha reuniaun KM Sesta nee (18/10/2024), iha Palasiu Governu.
“Akordu nee ho objetivu atu hasae reziliénsia ema rihun 46 resin iha área rurál Munisípiu Manatuto nian”, haktuir komunikadu neebe STL asesu iha Sesta nee (18/10/2024).
Enkuantu projetu nee hakarak liu-liu hadia asesu ba bee, promove adosaun prátika agríkola intelijente sira neebé adapta ba mudansa klimátika no hametin kapasidade institusionál no organizasionál sira husi komunidade rurál sira. Inisiativa, aliñadu ho prioridade sira husi IX Governu Konstitusionál, inklui investimentu sira iha infraestrutura bee nian, formasaun husi grupu agríkola sira no dezenvolvimentu husi meiu subsisténsia sira neebé diversifikadu liu no reziliente ba mudansa klimátika sira.
Hein mós katak modelu dezenvolvimentu rurál nee atu implementa iha Manatuto sei replika iha munisípiu sira seluk, nunee promove dezenvolvimentu sustentável TL nian.
(gui)
