DILI, STLTIMORLESTE.com – Iha loron Kuarta (09/07/2025) Konselhu Ministru (KM) hasoru malu iha Palasiu Governu no aprova projetu Dekretu Lei neebe aprezenta husi Ministru Ensinu Superior, Siensia no Kultura (MESSK), Jose Honorio da Costa Pereira Jeronimo ba Kriasaun Institutu Politekniku Timor Leste (TL).
Iha enkontru nee katak, Institutu Politekniku Timor Leste, neebe abreviadu ho naran IPTL, susede ba atual Institutu Politekniku Betano nian, hodi fo karater nasional ba instituisaun ensinu superior foun nee. Orgaun atual sira, rekursu umanu ensinu no laos ensinu no patrimoniu Institutu Politekniku Betano nian la muda, atu nunee bele garante kontinuidade institusional no funsionamentu instituisaun ensinu superior sira neebe halao ona dezde 2017, sein prejuizu ba kriasaun unidade organizasional foun sira.
Iha enkontru nee deside katak, IPTL sei iha sede iha Betano no ninia jestaun administrativa no akademika bele inklui instituisaun ensinu superior sira iha munisipiu sira seluk. Kondisaun apropriadu sira iha ona hodi garantia viajen husi orgaun kompetente sira, hodi garante jestaun efisiente ba ensinu superior tekniku.
Diploma nee mos determina katak, Institutu foun nee mantein akreditasaun institusional ba tinan lima neebe fo husi Ajensia Nasional ba Avaliasaun no Akreditasaun Akademika, Institutu Publiku, (ANAAA I.P.) ba Institutu Politekniku Betano, tuir termu Diploma Ministerial Nu. 11/2023, loron 19 fulan abril, laho nesesidade atu adota rejime instalasaun ka periodu tranzitoriu.
Delibera Reestruturasaun ba Administrasaun Indireta Estadu nian
Iha okaziaun nee, KM mos deside atu halo reestruturasaun ba administrasaun indireta Estadu nian, ho objetivu atu hasae efisiensia no transparensia jestaun publika nian, hamenus redundansia institusional sira no hadia artikulasaun entre politika publika sira no nia implementasaun.
Rezolusaun nee estabelese prinsipiu orientador ba reorganizasaun abranjente entidade publika sira ho autonomia administrativa no finanseira, ho objetivu atu garante espesializasaun teknika neebe boot liu, rasionalizasaun rekursu no hadia kualidade servisu neebe presta ba sidadaun sira. Planu mak atu tau hamutuk entidade sira ho funsaun neebe sobrepoin ka hanesan, inkorpora instituisaun balun iha estrutura ministeriu setorial sira, no transforma institutu publiku balun ba servisu diretu governu nian. Reforma sei inklui mos reestruturasaun no disolusaun husi entidade governamental indireta balun, ho sira nia responsabilidade sei transfere ba ida idak nia linha ministerial sira.
Konteudu espesifiku husi reestruturasaun nee sei regula husi konjuntu dekretu governu nian, neebe sei elabora no submete iha tempu loloos ba konsiderasaun no aprovasaun husi Konselhu Ministru.
Tuir Visi Prezidente Asuntu Parlamentares, Aderito Hugo da Costa hafoin enkontru nee dehan, Reestruturasaun Ida nee ba I.P no E.P, Ida nee komprimisiu IX Governu Konstitusional nian, komprimisiu Primeiru Ministru (PM), Kay Rala Xanana Gusmao nian, tanba nee kontinuasaun Diskusaun produsaun efeitu Dekretu Lei Ida, depois ajusta hotu.
Nia dehan, ba Reestruturasaun I.P no E.P, rekolha hotu ona informasaun no aprezenta ona esbosu, tanba nee Hein deit aprovasaun.
“Ita hotu hatene katak I.P no E.P iha TL, 40 ital, harii iha tinan 4 Liu ba, iha VIII Governu Konstitusional, tanba nee Reestruturasaun nee komesa Lao Hela, linha Ministerial neebe iha I.P no E.P, sei reestrura hotu hodi responde komprimisiu IX Governu nian, haree ba faktua no funsionamentu Administrasaun direitamente neebe estabelese iha tinan hirak Liu ba nee, ninia efisiensia no efikasia Organizasaun ninian, tanba nee tenke halo Reestruturasaun,” Dehan Visi Prezidente Parlamentares.
(jos)
