DILI, STLTIMORLESTE.com – Governu liu husi reuniaun Konselhu Ministrus aprova projetu Proposta Lei, neebe aprezenta husi Ministru Interior (MI), Francisco da Costa Guterres, kona-ba Rejime Juridiku Artes Marsiais.
Objetivu husi inisiativa lejizlativa ida nee maka atu estabelese rejime juridiku ida neebe klaru ba ensinu, aprendizajen no pratika artes marsiais iha Timor Leste, hodi asegura katak atividades nee halao ho seguru, ordenadu no tuir prinsipius orden publika nian.
“Proposta nee ho objetivu atu prevene no kombate violensia neebe asosiadu ho pratika artes marsiais, liuliu entre joven sira, liuhusi kria mekanizmu monitorizasaun, fiskalizasaun, no responsabilizasaun neebe efikas ba sentru, klube, no ajente sira neebe envolve. Tanba nee maka introdús figura “perfíl risku”, neebe bele aplika ba organizasoins ho istoria komportamentu antisosial ka violentu, sujeitu ba medida kontrolu institusional espesifiku sira,” haktuir nota komunikadu neebe STL asesu husi Governu, Kuarta (30/07/2025).
Diploma nee mos propoin kriasaun orgaun foun rua Komisaun Reguladora Desportu ba Artes Marsiais (CRDAM – sigla portuges) no Komisaun Monitorizasaun no Fisklizasaun Artes Marsiais (CMFAM, sigla iha lian portuges), atu nunee bele asegura koordenasaun institusional neebe forte entre entidade governamentais kompetentes no sosiedade sivil.
Entre prinsipiu orientador sira neebe konsagra iha proposta lei nee, destakada maka prioridade ba orden publika, prevensaun no prekausaun ba riskus, koordenasaun institusional, responsabilizasaun individual no koletiva, liberdade ba asosiasaun no la-partidariza, hodi garante katak artes marsiais manten hanesan pratikas formasaun pesoal no kultural, neebe laiha influensia husi politiku-partidariu sira.
“Ho proposta lei ida-nee, Governu hakarak atu salvaguarda arte marsial sira-nia karater desportivu no kultural, hodi promove sira-nia pratika neebe responsavel no kontribui ba seguransa no moris-diak sosiedade timoroan nian,”
(alb)
