DILI, STLTIMORLESTE.com – Konselhu Ministrus (KM) aprova projetu Rezolusaun Governu neebe aprezenta husi Primeiru Ministru, Kay Rala Xanana Gusmão, kona-ba modelu Administrasaun Espesial Rejiaun Administrativa Espesial Oekusi Ambenu (RAEOA) nian nomos Zona Ekonomia Espesial (ZEE).
Rezolusaun nee aprezenta husi Primeiru Ministru, bainhira prezide enkontru ho ministru sira iha Konselhu Ministru, iha Palasiu Governu, Dili, Kuarta (02/04/2025).
Tuir PM Xanana katak, objetivu husi Rezolusaun Governu ida nee mak atu organiza, liu husi konsulta ho populasaun lokal enklave Oekusi-Ambeno, modelu foun ba Administrasaun Autoridade Rejiaun nian, nunee mos modelu Zona Ekonomia Espesial neebe tuir konstituisaun prevee ba rejiaun nee.
Iha mos hanoin atu konsulta ho dirijentes administrativu, autoridade lokal no sosiedade Oekusi-Ambeno nian atu hili no dezigna entre sira, kona-ba se mak sei bele ezerse mandatu administrativu sira rejiaun nian, iha autoridade no iha Zona Ekonomika Espesial.
Iha enkontru nee mos Konselhu Ministru aprova Projetu Rezolusaun Governu neebe aprezenta husi Visi Ministra ba Asuntus Assosiation of Southeast Asian Nation (ASEAN), Milena Maria da Costa Rangel, kona-ba kontribuisaun voluntaria ho montante osan US$ 500.000 ba Sentru Koordenasaun Asistensia Umanitaria ASEAN (ASEAN Coordinating Center for Humanitarian Assistance (AHA Center), hodi apoia resposta ba situasaun emerjensia iha Republika Uniaun Mianmar, tanba kauza husi rai nakdoko foin lalais, neebe afeta ba rejiaun nee ho konsekuensia grave, inklui lakon vida, dezlokasaun populasaun no destruisaun ba infraestrutura sosial, ekonomika no ambiental.
(jos)
