BAUKAU, STLTIMORLESTE.com – Konselhu Munisipal Kombatentes Libertasaun Nasional (KMKLN) Baukau, seidauk valida dadus kontestasaun husi kombatentes rejistu tinan 2009 hamutuk 7.800, tanba orsamentu la sufisiente.
Prezidente KMKLN Baukau, Fernando Beredu’u Gusmão hateten, prosesu rejistu kombatentes iha tinan 2009, hahu rejistu husi komisaun rejistradus Konselhu Kombatentes Libertasaun Nasional neebe lansa iha Baukau, hodi komisaun husi kombatentes sira nia kontribusaun ba luta libertasaun nasional hafoin rejistu iha database no iha prosesu, verifikasaun ba dadus sira komisaun nafatin rona deklarasaun husi kombatentes sira hafoin alista iha database, maibe hafoin anunsiu lista edital lista kombatentes barak la satisfas ho dedikasaun neebe atribui.
Tanba nee Ministeriu Asuntu Kombatentes no Libertasaun Nasional liu husi Konselhu Kombatentes Libertasaun Nasional fo oportunidade ba kombatentes la satisfas sira submete karta kontestasaun. No kontestasaun sira nee remata ona, nunee Konselhu Munisipal hamutuk ho ekipa Nasional iha nivel Munisipiu valida ba dadus kontestasaun sira, maibe seidauk konklui.
“Uluk ami husu sira, sira koalia sai mak ami hakerek, maibe nee sala nafatin estadu entrega fali ba sira rssik hakerek ami haree kurizi deit, se sira nia hareker nee mak loos pasa ona ba 8a14 3a7 karik pasa ona. Agora seidauk hotu sei iha 7.800,” Beredu’u hateten ba STL, iha knaar fatin Vila Antiga, Baukau, Kuarta (10/12/2025).
Nia informa, dadus kontestasaun neebe ekipa nasional hamutuk ho Konselhu Munisipal halo ona validasaun hamutuk 1532, kompostu Postu Kelekai, Laga, Baukau Vila no Baguia enkuantu Postu Administrativu Vemasi no Venilale seidauk, tanba kestaun orsamentu no tempu.
Nia sublina, validasaun refere akontese, tanba kombatentes sira la satisfas ho dedikasaun neebe antes nee iha, maibe dadus kontestasaun husi Postu Vemasi no Venilale seidauk, tanba nee Konselhu sei esforsu hodi solusiona.
“Sei repete fali, tanba ita sei hein hela orsamentu husi Nasional,” Beredu’u akresenta.
Nia deklara, bainhira orsamentu husi Nasional aloka ona ba Konselhu Munisipal sei kontinua halo validasaun, nunee bele finaliza hodi relata ba Nasional foti dezisaun.
Jornalista: Tomas Reis
Editora: Carme Ximenes
