BAUKAU, STLTIMORLESTE.com – Konselhu Munisipal Protesaun Sivil (KMPS) hamutuk ho parseiru servisu World Vision Timor Leste (WVTL) evalua progresu servisu durante fulan 3 iha Munisipiu Baukau.
Estrutura KMPS Baukau, atual Diretor Diresaun Risku Dezastre Naturais (DRDN), Clementino Pedro Barboza esplika, estabelesimentu estrutura Konselhu Munisipal Protesaun Sivil iha nivel Munisipiu, lansa ona iha fulan Marsu tinan nee no estabelese too ona iha nivel Postu Administrativu Vemasi neebe involve masimu husi funsionariu publiku sira iha Postu vemasi kombate no prevene risku dezastre naturais neebe kada tinan afeta ba komunidade sira.
Maibe fulan Junhu tinan nee, parseiru servisu World Vision Timor Leste nia misaun sei termina iha Munisipiu Baukau, tanba nee halo evaluasaun servisu ba KMPS durante fulan 3 iha Munisipiu Baukau.
“Ita nia atividade ohin nee avaliasaun atividade lubuk ida iha Baukau liu-liu Suku 7 iha Vemasi, entaun iha dia 30 agora sira mandatu hotu ona, entaun atu hatene forsa no frakeza durante implementa atividades nee, ohin hamutuk para fo hanoin fila fali atu hadia diak liu tan preparasaun ba oin,” hateten Clementino ba jornalista sira hafoin remata atividade evaluasaun iha salaun Gatarego Bahu, Tersa (27/05/2025)
Nia sublina, liu husi evaluasaun ba progresu servisu KMPS durante fulan 3 hahu husi Marsu too Maiu nee iha dezafius lubuk ida mak estrutura KMPS enfrenta, maibe nee laos obstaklu, tanba liu husi dezafius mak sai esperiensia hodi hadia servisu diak liu tan hodi atende komunidade sira iha diak liu tan iha futuru mai.
Nia fundamenta, estabelesimentu KMPS iha Baukau hetan apoiu masimu husi parseiru servisu World Vision Timor Leste, no fulan Junhu tinan nee misaun sei remata iha Munisipiu Baukau, maibe nee la hamate espiritu estrutura, tanba iha ona referensia atu kontinua.
“Nee sai referensia ba oin ita atu hadia diak liu tan, preparasaun no planu oinsa halo mos kooperasaun ho parseiru sira neebe area hanesan liga ba risku dezastre naturais, tanba nee ohin konsentra iha nee hotu-hotu koalia ba atividade nunee aban bainrua implementa tuir mata dalan,” Clementino akresenta.
Koordenador Programa WVTL Baukau, Maurício Gusmão esplika, programa KMPS nuudar parte ida husi projetu rezilensia klimatika ba ema hotu liu-liu ba area dezastre naturais nian neebe mak durante nee parseiru ho Governu Timor Leste.
“Durante fulan 3 nia laran progresu mak ita ofisializa ona KMPS iha Vemasi nee progesu diak ida neebe mak Autoridade Munisipiu Baukau foin primeira vez ofisializa KMPS Munisipal no Postu,” nia informa
Maurício katak, durante fulan 3 WVTL Baukau hamutuk ho parseiru Cruz Vermelha Timor Leste Baukau fasilita ona formasaun ba estrutura Postu no Munisipiu nunee futuru sai materia hodi fasilita fali estrutura KMPS ba Postu seluk neebe seidauk estabelese, tanba misaun WVTL iha Baukau sei termina iha tempu besik.
Entretantu evaluasaun progresu servisu KMPS durante fulan tolu, realiza iha salaun Gatarego, Suku Bahu, Postu Baukau Vila neebe hetan partisipasaun husi estrutura KMPS Postu Vemasi no Munisipiu.
(tom)
