DILI, STLTIMORLESTE.com – Komisaun Nasional Desportu (KND) kondena aktu falsifikasaun dokumentu identidade ba jogador Selesaun Nasional nain 2.
Tuir Sekretariu Ezekutivu KND, Cesarino da Silva katak, komisaun Nasional Desportu halo reuniaun extraordinariu ho ajenda uniku kona-ba falsifikasaun dokumentu ba jogador selesaun nasional nain rua, nunee mos halo analiza ba polemika kongresu FFTL nian, nunee haree mos ba karta notifikasaun husi Ministru Juventude, Desportu, Arte no Kultura, asuntu nota kona-ba pena AFC ba jogador Jaimito Soares no kongresu FFTL 2024 nebe la kumpri estatutu FFTL.
“KND husu lalais ba FFTL atu halo investigasaun interna hodi identifika entidade neebe envolve iha kazu falsifikasaun dokumentu (pasaporte) ba jogador nain rua, nunee bele hetan mos sansaun husi FFTL, husu ba ministeriu relevante halo investigasaun klean ba kazu falsifikasaun dokumentus hodi hetan pasaporte ba jogador Jaimito Antonio da Costa Soares no Antonio da Costa Soares Moniz,” dehan Cesarino liu husi Konfrensia Imprensa neebe halao iha MJDAK, Lecidere, Dili, Sesta (25/10/2024).
Nia apela ba FFTL hodi asumi responsabilidade administrativamente hodi selu lalais multa neebe jogador nain rua hetan no labele husik jogador sira sai nafatin vitima ba inkapasidade jestor FFTL nian. KND mos halo analiza klean ba polemika organizasaun FFTL nian tuir Lei baze Desportu, artigu 16 no Dekretu Lei nu. 60/2022 kona-ba kompetensia Komisaun Nasional Desportu. Mak KND kaer nafatin ba independensia organizasoens desportiva sira nian hanesan, husu ba FFTL atu kumpri nafatin estatutu nuudar regra federasaun ba iha realizasaun kongresu tantu ba assosiasaun munisipiu no nasional.
Nia dehan, FFTL atu servisu hamutuk ho KND, CDTL no CONTL atu kria komisaun independente hodi normaliza tiha problema sira hotu iha FFTL hodi rezolve problema neebe akontese iha FFTL, KND sei kontinua monitoriza nafatin kualker atividade kongressu FFTL nian, no sei rekomenda ba governu atu la rekonhese bainhira FFTL kontinua viola ninia estatutu. KND mos husu ba Governu provizoriumente hapara kualker apoiu ba FFTL, bainhira la buka mekanizmu ida aproriadu hodi solisiona problema interna FFTL nian.
Nia hatete, KND rekomenda ba Governu hodi husu ba FIFA no AFC atu hamutuk ho governu kria komisaun independente ida, atu tau matan hodi realiza kongresu FFTL nian, nune bele hetan hikas kredibilidade ba membru sira no komunidade timorense.
(mar)
