DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial AS, tanba lori liman basa lezada hanesan feen ho inisial FA nia hasan sorin karuk.
Tuir akuzasaun neebe Juiz prosesu Jose Maria lee sai iha loron Segunda nee katak, arguidu ho lezada relasaun hanesan feen no laen.
Iha loron 16 fulan Agostu tinan 2023, tuku 8 kalan, iha Ermera, arguidu lori liman basa lezada nia hasan dala ida, hodi rezulta lezada nia hasan moras no ba tratamentu iha klinika.
Motivu husi problema nee, tanba deit arguidu koalia lezada la rona, halo arguidu nervozu hodi baku lezada.
Konsekuensia husi arguidu nia hahalok nee, halo lezada sente moras iha hasan hodi hatoo keixa.
Tanba nee, MP akuza arguidu komete krimi Violensia Domestika ho forma Ofensa Integridade Fizika Simples, neebe previstu iha artigu 145 husi Kodigu Penal.
Hatan ba akuzasaun neebe iha, arguidu konfensa imparsial katak, arguidu lori duni liman basa lezada dala ida iha hasan, tanba arguidu koalia lezada la rona hodi halo tuir.
Arguidu deklara, depois liu tiha problema nee, arguidu mos tur hamutuk ho lezada nia familia sira hodi rezolve tiha. Hahu husi problema too agora la iha tan problema ona.
Lezada mos haforsa tan akuzasaun katak, agora sira diak malu ona la iha tan problema.
Rona tiha arguidu no lezada, iha alegasaun Prokurador Gustavo husu ba iha Tribunal atu tetu deklarasaun hodi hodi foti desizaun ba iha prosesu nee.
Enkuantu husi parte Defeza Jose Maria Guterres husu Tribunal atu aplika pena Admoestasaun ba iha arguidu, tanba oras nee daudaun sira diak malu ona.
Rona tiha alegasaun nee Tribunal adia ba loron seluk hodi rona desizaun.
Audensia julgamentu nee prezide husi Juiz Singular Jose Maria, MP reprezenta husi Prokurador Ozorio de Deus, arguidu hetan asistensia legal husi Defensor Publiku Jose Maria Guterres.
(ter)
