DILI, STLTIMORLESTE.com – Konselhu Ministru delibera hodi autoriza Ministra Edukasaun, Dulce de Jesus Soares halo selebrasaun ba akordu kontribuisaun finanseira entre Timor Leste ho Ajensia Kooperasaun Internasional Koreia (KOICA) ba dezenvolvimentu projetu “for every child, early childhood care and education” ba labarik idak-idak, kuidadu no edukasaun iha primeira infansial.
Nunee, kontribui finanseira nee governu liu husi KOICA apoiu ba Ministeriu Edukasaun ho osan montante hamutuk US$ 6 milhaun ba projetu dezenvolvimentu “ba programa edukasaun pre eskolar ba munisipiu rua mak hanesan Munisipiu Baukau no Munisipiu Bobonaro durante tinan 4.
Akordu nee prevee finansiamentu ho montante US$ 6 milhaun, neebe aprezenta husi Ministra Finansa neebe reprezenta Governu Timor Leste hodi asina akordu nee atu fo apoiu ba iha munisipiu rua nee, nunee bele hasae taxa kriansa ho idade tinan 5, nunee bele iha preparasaun diak antes tama ba ensinu baziku
Projetu nee ho objetivu atu fo apoiu ba labarik Timoroan sira hahu husi idade tinan 3 to’o iha tinan 5, hodi alkansa sira nia potensial tomak liu husi asesu ba programa dezenvolvimentu infantil ho kualidade neebe mak aas.
“Ita nia numeru ba labarik neebe mak partisipa ba hola parte iha edukasaun pre eskolar munisipiu rua nee sei menus, ho ida nee KOICA haree katak presiza tebes-tebes atu fo apoiu ba Munisipiu Bobonaro no Munisipiu Baukau, nunee ita bele hasae taxa partisipasaun kriansa idade 3 ate 5 anos atu nunee sira bele iha preparasaun diak ida antes tama ba ensinu baziku,” katak ME, Dulce de jesus ba jornalista sira iha Palasiu Governu, Dili, kuarta (26/03/2025)
(EST 2)
