DILI, STLTIMORLESTE.com – Eskola Baziku Filial (EBF) no 5 Komoro husu atu koloka profesores nain hitu (7), hodi bele substitui hikas iha profesores neebe reforma ona.
“Defikuldade nebe mak ami hasoru, primeiru tanba ami nian profesores nain hitu mak reforma ona, entaun ninia klase balun ita taka, tanba uluk nee ita too turma H, maibe agora daudaun too G deit, maibe ita espera katak ho rekrutamentu husi ME nian nee bele troka fali iha Sira nian fatin, ami presiza tan profesores nain 7, uluk ita iha profesores 56, agora ita iha 48,” dehan Koordenador Eskola Baziku filial (EBF) no 5 Komoro, Marcelino Moniz ba STL, Segunda nee (26/01/2026).
Nia dehan, total estudantes hamutuk dois mil sentu des, total sala aprendizajen 17, nee duni sira presiza tan profesores nain hitu ba sira nian eskola, tanba too agora sira sei menus profesor no nain hitu mak reforma ona.
Nunee mos Diretor Nasional Rekursu Umanu iha ME, João Amaral hatete, iha tempu badak sei koloka bolsa kandidatu profesores nivel ensinu baziku nian neebe mak ministeriu rekruta ona iha tinan 2024.
“Iha tempu badak ita sei koloka bolsa kandidatu profesores nivel ensinu baziku nian neebe mak ita rekruta ona iha tinan 2024, nunee bele koloka ba eskola neebe menus profesores, tanba nee rekrutamentu neebe mak ita halo hodi bele substitui fali profesores neebe tama ona ba reforma,” nia esplika.
(jac)
