DILI, STLTIMORLESTE.com – Kolokasaun Bolsa Kandidatu profesores nivel Ensinu Sekundariu Jeral (ESJ) no Tekniku Vokasional tenke fo fiar ba Ministeriu Edukasaun (ME).
Kestaun nee hatoo husi Ministra Edukasaun (ME), Dulce de Jesus Soares ba jornalista sira iha sentru impresaun Komoro, Sesta (17/10/2025).
“Ohin hau koalia katak, kolokasaun ba 2026 nee sira neebe mak ba iha ensinu baziku, maibe agora dadaun ME kontinua servisu iha area ensinu sekundariu jeral no tekvo, tanba iha kompleksidade oituan iha ensinu sekundariu jeral. Diferente tebes ho ensinu baziku no pre eskolar, nee tanba saida, primeiru tenke halo verifikasaun ba Professor sira, tanba iha ESJ ninia teste nee ita halo agrupamentu disiplina. Agora saida mak akontese iha terenu, dala ruma ema ruma por ezemplu,nia lisensiadu iha kestaun ekonomia, maibe nia hanorin relijiaun, entaun ita tenke haree fila fali atu halo rekolokasaun. Professor sira hanesan nee ita presiza kandidatu ida iha agrupamentu ba lisensiadu neebe mak hanorin iha jesatun no ekonomia,” nia esplika.
Nia dehan, akontese mos iha Professor balun mak sira agora hanorin iha ensinu sekundariu, maibe sira iha deit bacharelatu, maibe tuir lei katak, atu hanorin ensinu sekundariu nee tenke lisensiatura, tanba nee haree fila fali rekolokasaun ba faze sira nee, tanba nee mak tempu oituan iha prosesu ba iha kolokasaun ensinu sekundariu jeral no tekvo, maibe tenke fiar ba ME katak, Ministeriu nafatin rezolve asuntu ida nee.
Jornalista: Jacinta Sequeira
Editora : Domingas Gomes
