DILI, STLTIMORLESTE.com – Komandante Komponente Higino das Neves termina ona mandatu hanesan Komandante Komponente Navál iha fulan kotuk.
Komandante Komponente Higino das Neves dehan, tuir lei estatu militar foun nee Komandante Komponente Navál nee asumi kargu ba tinan rua deit no renova ba tinan ida, maibe daudaun nee nia asumi kargu hanesan Komandante Komponente Navál ba besik tinan 4 ona.
“Hau mos lo-loos troka ona mas hau sei hein. Tanba nee sei iha nivél ida Prezidente Repúblika para atu haree aseita mak hau nomeasaun ida nee. Nee mak hau sei hein, mas hau mos mandatu hotu ona,” hatete Komandante Komponente Naval, Comodoro Higinio da Neves ba jornalista iha Componente Naval, Hera, Segunda (10/11/2025).
Nia tenik, tuir prosesu normal nee Komandante Komponente Navál asume deit mandatu ba tinan rua no rekondús ba tinan ida.
“Iha lei tinan rua, aumenta tan tinan ida tán. Hau liu ona tolu ona, normal tinan tolu deit. Mas hau iha nee ona besik ona tinan haat,”nia deklara.
Entratantu tuir decreto-Lei N.º 33 /2020 de 2 de Setembro kona-ba estatutu foun militár FALINTIL- Forsa Defeza Timor-Leste (F-FDTL) husi artigu 93 hateten nomeasaun ba Komandante Komponente sira.1 Komandante Komponente sira nomea no ezonera husi Prezidente Repúblika sub- proposta husi Governu, maibe hafoin rona tiha Xefe Estadu Maiór Jenerál Forsa Armada (XEMGFA)no mos Governu liu husi reuniaun Konsellu Superiór Militár no reuniaun Konsellu Superiór no Seguransa.2 Kargu ba Komandante Komponente sira mandatu tinan rua deit so halo renovasaun ba tinan ida deit.
Jornalista: Jeniche da Costa
Editora: Domingas Gomes
