AMBENO, STLTIMORLESTE.com – Komandante Polisia Nasional Timor Lorosae (PNTL) Rejional Oekusse, Superintendente Nicolau Francelino da Costa rekonhese kondisaun kazerna PNTL iha Postu Administrativu Pasabe Aat Grave.
“Ligadu ho observasaun publiku ninian kona-ba kondisoens Komando PNTL nomos kazerna iha eskuadra PNTL sira iha Rejional Oekusi, ita boot sira akompanha muito bem, realidade PNTL Oekusi enfrenta kondisoens eskuadra PNTL nomos kazerna PNTL neebe kondisoens ladun diak. Hau hanoin, ami nia Komando Jeral PNTL mos iha ona planu atu hadia ami nia eskuadra nomos ami nia kondisoens kazerna sira neebe membru PNTL hela ba iha kada eskuadra, tanba ita haree kada eskuadra sira nia kondisoens agora grave tebes-tebes, maibe ami husi PNTL hahu husi hau nuudar Komandante PNTL Rejional Oekusi ho membru PNTL tomak, ami iha komitmentu ida neebe mak boot, ami kontinua nafatin halo servisu hodi servi povu iha rai doben TL, liu-liu iha Rejiaun Administrativu Espesial Oekusi,” dehan Komandante PNTL Rejional Oekusi, Nicolau Francelino da Costa ba STL iha ninia servisu fatin PNTL Sentru Rejional Oekusi, Kuarta (22/01/2025).
Iha fatin ketak, Administrador Postu Administrador Pasabe, Paulino Marques mos rekonhese katak loos duni, kondisaun kazerna PNTL iha Eskuadra Pasabe ladun dignu, tanba nee foin lalais nee Prezidente Autoridade Rejiaun Administrativu Espesial Oekusi Ambeno, Rogerio Tiago de Fatima Lobato mos vizita ona kondisoens Kazerna PNTL iha Pasabe, fiar katak tempu badak sei buka solusaun hodi hadia.
Antes nee, Prezidente Autoridade Rejiaun Administrativa Espesial Oekusi-Ambeno (PA-RAEOA), Rogerio Tiago de Fatima Lobato mos haree ona kondisaun Kazerna PNTL iha Postu Administrativu Pasabe hatudu katak kondisaun kazerna neebe ladun dignu.
(jos)
