AINARO, STLTIMORLESTE.com – Komando FALINTIL-Forsa Defeza Timor Leste (F-FDTL) realiza serimonia abertura Ezersisiu Militar Cobra ba tinan 2025, iha Minisipiu Ainaro.
Xefe Estadu Maior Jeneral F-FDTL, Tenente Jeneral Domingos Raul “Falur Rate Laek” dehan, Komando F-FDTL hili Munisipiu Ainaro laos koinsidensia. Munisípiu ida nee reprezenta teatru operasaun nian ho valor estratejiku aas mak hanesan terenu foho no rai lolon neebe sei koko hotu nia abilidade atu halo manobra iha kondisaun kritiku, no lorredor natural sira neebe presiza domíniu tátiku no koordenasaun entre unidade partisipante.
“Ho sentidu responsabilidade boot no orgulhu militar mak hau deklara ofisialmente abertura ba Ezersisiu Militar “Cobra” F-FDTL iha Munisípiu Ainaro,” hatete Falur Rate Laek liu husi nia diskursu, wainhira halao abertura ba Ezersisiu Cobra ba tinan 2025 iha Munisipíu Ainaro, Segunda (13/10/2025).
Nia tenik, pozisaun elevadu sira neebe ideál ba formasaun rekonhesimentu, defeza teritoriál no operasaun kontrolu area, klima no jeografia neebe hametin reziliensia no adaptabilidade operasional, rekonhesimentu ba Ainaro sai fatin rezistensia eroika.
“Ohin iha Munisipiu nee sai palku atu perfeksiona ita nia prontidaun militar ba militár sira hotu. Ezersísiu ida nee marka tranzisaun kritiku husi teoria ba prátika. Prinsipiu doutrinariu, tatika, no estratejia sira neebe estuda iha sala formasaun nian agora sei ezekuta iha kondisaun real neebe aprosima realidade operasional,” nia deklara.
Iha fatin hanesan Sekretariadu Autoridade Munisipíu Ainaro, Robertino de Araújo orgulhu tebes, sente hanesan prevelezu ida ba Munisipíu Ainaro, tanba primeira vez Komando F-FDTL, liu husi aktividade ezersísiu cobra ba tinan 2025 neebe maka ohin halo abertura iha munisipíu nee.
“Ita senti orglhu boot no ondra teb-tebes tanba foin primeira veis halao halo exersisiu ba tinan 2025 nian no abertura iha Munisipíu Ainaro,” nia afirma.
Jornalista: Jeniche da Costa
Editora: Domingas Gomes
