DILI, STLTIMORLESTE.com – Komandante Komponente Navál, Komodoro Higino das Neves informa, Xefe Estadu Maiór Jenerál Forsa Armada (XEMGFA) Domingos Raul Falur Rate Laek fo ona instrusaun ba Komando Forsa Apoiu Servisu atu instala baze militár iha area Suku Sananai, Postu Administrativu Laklubar, Munisipiu Manatuto.
Nia dehan, estabelesimentu baze militár nee bazeia ba iha lei konseitu estrátéjiku militár define baze militár Komponente nian iha lei nee, neebe afirma iha futuru Komando F-FDTL tenke iha tán kampu de batalha iha Manatutu nuudar baze ba treinamentu militár.
“Jenerál Xefe fó ona instrusaun ba Komando Forsa Apoiu Jeral sira, sei halo estrada uluk depois halo konstrusaun kiik koan para depois ita nia treinu baziku nee sei muda ba neeba,” hatete Komandante Komponente Navál Komodoro Higino das Neves ba jornalista sira iha Naval Heran, Segunda (04/08/2025).
Nia tenik, Sentru Instrusaun Komandante Nicolau Lobato iha Metinaro dala ruma iha futuru sei uza ba treinu mais avansadu nian ho tan treinu sira neebe hanesan akademiku liu-liu treinu ba formasaun ba ofisial nian no treinu formasaun ba kapitaun nian, sira nee mak sei tau iha neeba para sai fatin exelente ba treinu mais akademiku nian.
“Maibe treinu baziku sei muda ba iha Kampu Militár iha Manatuto inklui exersisiu konbinasaun arma sira hanesan agora nee sei halo iha kampu militár iha Manatuto. Depois futuru se ita sei iha exersisiu ho país sira seluk ita sei halo iha neeba, maibe primeiru ita tenke kria kondisaun, mak tenke estrada uluk, tenke kria uluk infraestrutura baziku ida iha neeba, iha bee iha fasilidade ruma liu-liu eletrisidade hotu para ita bele muda ba futuru treinamentu ida nee,” nia esplika.
Tanba ida nee iha ona konseitu estrátéjiku militár neebe define ona.
“Hau fiar katak Governu sei preokupa. Fiar katak señor Ministru iha mehi ida nee para atu dezenvolve. Baze militár nee sei halo iha Manatuto Sananai,” nia esplika.
Nia deklara, Komando konsidera hanesan fatin estrátéjiku ba militar ba futuru ba ezersísiu ba komponente boot. Ida nee la afeita ba populasaun tanba iha neeba iha fatin luan, espasu iha para ita bele tiru morteiru kainaun. Iha espasu ba kilat kiik no kilat boot bele tiru iha ne’ebá. Tanba haree ona katak, fatin neeba nee mais estrátéjiku ba dezenvolvimentu forsa armada Timor nian.
(jen)
