DILI, STLTIMORLESTE.com – Komando FALINTIL- Forsa Defeza Timor Leste (F-FDTL) ensera treinamentu kombinasaun arma neebe halao husi Komponente Terestre, Komponente Naval no Komponente Aero Ligeira inklui Unidade Polísia Militár no Unidade FALINTIL durante semana rua, hahu husi loron 14 Julhu too loron 25 Julhu 2025.
Komodoro dehan, iha serimonia enseramentu Ezérsísiu Kombinasaun Armas nee, nuudar faze preparasaun ba ezersísiu kobra nu’udar misaun profisional neebe estadu atribui mai instituisaun F-FDTL.
“Ezersísiu Kombinasaun Armas ida nee ho objetivu atu prepara imi hodi ba ezersísiu kobra oin mai no ami prepara imi para imi sai forsa ida neebe profisional liu hodi halao ita nia misaun ida neebe ita nia Estadu fo hela ba Instituisaun F-FDTL,” hatete Komandante Navál Komodoro, Higino das Neves ba jornalista sira hafoin ensera Treinamentu Kombinasaun Armas iha Komponente Naval Hera, Sesta nee (25/07/2025).
Sua Exelénsia Komodoró hatete, treinamentu refere susesu tanba iha lasu amizade, nunee konsege demonstra kapasidade hodi hetan klasifikasaun iha kompetisaun atu prepara ba misaun neebe sei atribui husi nai ulun sira.
“Imi nia Ezérsísiu Kombinasaun Armas nee ho susesu, tanba imi nia relasaun amizade servisu Kombinasaun ohin loron imi konsege idak-idak hatudu imi nia kapasidade hodi bele hetan primeiru klasifikasaun, Segundu klasifikasaun no Terseiru Klasifikasaun no kuartu klasifikasaun neebe durante imi halao, iha tempu neebe deit wainhira ita nia nain ulun sira fo knaar ba ita, hau nia parabens ba ita boot sira hotu ba susesu ida nee,” nia esplika.
Entretantu iha treinamentu kombinasaun arma tinan nee komandau F-FDTL mos halao kompetisaun ho modalidade tolu mak hanesan, Kompetisaun Prosedimentu Komando neebe manan nain 1⁰ lugár husi Komponente Forsa Terestre, 2⁰ Lugár husi Komponente Naval Esquadra Naval, 3⁰ Lugár husi Unidade Polisia Militár, 4⁰ Lugár Komponente Navál Unidade Fuzileirus.
Depois iha Kompetisaun Navegasaun Terestre 1⁰ lugár husi Komponente Forsa Terestre, 2⁰ Lugár Unidade FALINTIL, 3⁰ Lugár Komponente Aero Ligeira, 4⁰ Unidade Polísia Militár. Kompetisaun Armamentu Tiru 1⁰ Lugár Komponente Aero Ligeira, 2⁰ Lugár Komponente Naval Unidade Fuzileirus, 3⁰ Lugár Unidade FALINTIL, 4⁰ Lugár Komponente Naval Unidade Eskuadra Naval.
Kompetisaun Edukasaun Fízika 1⁰ lugár husi Komponente Forsa Terestre, 2⁰Lugár Komponente Navál Unidade Fuzileirus, 3⁰ Lugár Unidade FALINTIL, 4⁰ Lugár husi Komponente Naval Eskuadra Naval.
(jen)
