DILI, STLTIMORLESTE.com – Komando FALINTIL-Forsa Defeza Timor Leste (F-FDTL) fo kondekorasaun ba militár nain 39 inklui militar ativu no reforma sira.
Nia dehan, Komando F-FDTL atribui medalha komportamentu ezemplar ba militar nain 39 iha loron Sesta, iha Kuartel Jeneral Fatuhada Dili.
Nia esplika, atribuisaun medalha nee nuudar rekonhesimentu ida husi Komando ba nia militar sira nia komportantementu no kontribuisaun durante tinan 25 nia laran la komete infrasaun disiplinar no la viola prinsipiu nomos regulamentu disiplinar militar nian.
“Medalha nee meritu, medalha bom komportantementu iha tinan 25 nia laran katak ita nia Ofisial, Serjentu no Pras neebe hetan medalha nee la komete infrasaun disiplinar no viola prinsipiu nomos regulamentu disiplinar militar nian,” hatete Visi Xefe Estadu Maior Jenerál FALINTIL-Forsa Defeza Timor Leste (F-FDTL), Majór Jenerál Calisto Santos “Coliati” ba jornalista sira liu husi nia diskursu iha Kuartel Jeneral Fatuhada Dili, Sesta (13/02/2026).
Nia tenik, Komando F-FDTL rekonhese no valoriza sira nia komportamentu sira nia kontribuisaun ba rai no institusaun ida nee rai hela ba jerasaun foun sira tuir mai.
Iha fatin hanesan, Militar Reformadu Koronél Manuel Freitas “MAUBUTI”, informa, agradese no orgulhu ba Komando FALINTIL – Forsa Defeza Timor Leste (F-FDTL), tanba bele rekonhese sira nia kontribuisaun no dedikasaun durante tinan barak iha Institusaun Forsa Armadas.
“Loron ohin nee ba hau kontenti, tanba hau servi ba rai nee hahu husi hau sei tinan 19 agora hau nia idade tama ona ba 69, neebe hau kontenti no natoon ona para hau bele ba deskansa,” nia afirma.
Entretantu militar hirak nee kompostu husi ofisiais militar ativu, inklui sarjentu no prasa dezerva no reforma ona.
(jen)
