DILI, STLTIMORLESTE.com – Komando FALINTIL-Forsa Defeza Timor Leste (F-FDTL) hamutuk ho ONG Permatil, halao atividade kuda ai oan iha Lagoa Tasi Tolu, hodi haburas fila-fali rai iha ambiente neebe saudavel.
Hatete Coronel Renilde Guteres Cortereal da Silva, Atual hanesan Adjuntu Xefe Estadu Maior F-FDTL ba jornalista sira iha Tasi Tolu, Sesta nee (28/03/2025).
“Objetivu ohin ita kuda ai oan nee atu haburas fila- fali ita nia rai ida nee, tanba ita ema rasik mak estraga ita nia ambiente, tan nee mak ninia efeitu mosu oin-oin mak hanesan inundasaun, rai manas, ida nee mak maluk sira husi ONG Permatil konvida ami mai hamutuk ho sira hodi kuda ai oan sira nee, tanba ita hotu nia preokupasaun mak atu ita nia rai nee nia ekosistema diak nafatin,” nia haktuir.
Adjuntu Xefe Estadu Maior F-FDTL mos hakarak apela ba maluk Timoroan hotu prevene tesi ai no sunu ai arbiru, tanba ita tesi ai no sunu ai arbiru mak ninia efeitu sai rai manas no tempu udan inundasaun mosu iha fatin-fatin.
“Ita prezerva ita nia rai para matak nafatin, nunee ba futuru ita nia rai nee nia ekosistema nee diak ba nafatin,” nia esplika.
Entretantu membru F-FDTL hamutuk ho Funsionariu ONG Permatil kuda ai oan iha Lagoa Tasi Tolu, hodi haburas rai Tasi Tolu.
(jen)
