DILI, STLTIMORLESTE.com – Komando FALINTIL-Forsa Defeza Timor Leste (F-FDTL) ho Komando Polísia Nasionál Timor Leste (PNTL) halo enseramentu operasaun ouro Forsa Tarefa Konjunta neebe kumpri ona misaun garante seguransa iha ambitu serimonia nasional sira no selebrasaun natal no tinan foun 2026 iha Territóriu Timor Leste (TL).
Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raul “Falur Rate Laek” hatoo dezeja ba entidade hotu neebe prezente, liu-liu ba mane no feto neebe serbi iha fileira PNTL no F-FDTL. Hein katak siklu foun ida neebe agora hahu lori prosperidade, estabilidade no dame ba Timor-Leste (TL).
“Ita halibur malu ohin hodi enserra formalmente Forsa Tarefa Konjunta, atu rekonhese méritu esepsional husi servisu neebe halao husi pesoál sira PNTL no F-FDTL nian. Sira nia dezempenhu durante ezersisiu operasionál ida nee sai ezemplu kona-ba profisionalizmu no dedikasaun. Susesu misaun neebe asegura ita nia populasaun sira nia trankuilidade durante selebrasaun nasional no tempu festividade, bazeia ba sira nia sakrifisiu pesoál no laran-luak,” hateke Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raul “Falur Rate Laek” liu husi nia deskursu iha ambitu enseramentu Forsa Tarefa Konjunta PNTL ho F-FDTL iha Kuartel Unidade Espesial Polísia (UEP) Bairo Pite, Sesta (16/01/2026).
Tenente Jenerál Domingos Raul Falur Rate Laek mos rekonhese no husik hela apontamentu balun konaba realidade tátika neebe sira hasoru. Operasaun sira iha terrenu konfronta ho dezafiu lojistiku no operasionál, liu-liu iha termu mobilidade ba área remota, jestaun rekursu umanu hodi kobre postu hotu-hotu, no kapasidade komunikasaun no protesaun individuál. Difikuldade sira-nee, hasoru rasik husi sira neebe halao operasaun iha liña oin merese iha konsiderasaun ho respeitu ba orgaun sira neebe foti desizaun katak modernizasaun ita-nia forsa tenke lao hamutuk ho ezijénsia sira husi misaun sira neebe atribui.
“Hau dehan ida nee tanba misaun la remata iha nee. Ambiente seguransa nee dinámiku no ezije prontidaun permanente husi ita hotu. Tanba nee hau hakarak anunsia katak iha tempu badak ita sei intensifika servisu hamutuk. Operasaun foun sira neebe foka ba kombate atividade irregulár sira iha territóriu nasional, no krusialmente intensifikasaun rigorozu ba kontrolu fronteira hodi mitiga atravesa no entrada ilegal sira,” nia informa.
Nia deklara, ba ida nee importante tebes atu konsolida doutrina ida neebe loos konaba interoperabilidade. Kooperasaun entre F-FDTL no PNTL labele sirkunstánsia deit, maibe tenke estrutural. “Ita tenke kuda sentidu ida neebe klean konaba responsabilidade neebe partilladu. Ita serve objetivu ida deit,soberania no seguransa ita nia populasaun nian,” nia tenik.
“Iha sentidu ida nee, Tenente Jenerál Domingos Raul Falur Rate Laek husu no apela ba militár ida-idak no polisia ida-idak atu mantein konduta étika iha nível hotu-hotu.
“Farda neebe ita hotu hatais nuudar símbolu lulik ba nasaun. Hotu-hotu tenke evita, ho kustu saida deit, partisipasaun ruma ka komplisidade ho atividade ilisitu ka illegal sira no kombate favoritizmu hodi inklina ba grupu ruma. Hahalok hanesan nee laos deit sobu imajen no kredibilidade husi ita nia instituisaun nobre, maibe estraga fundasaun sira husi nasaun neebe harii ho sofrimentu, ruin no ran neebe ita jura atu defende. Disiplina no integridade mak ita nia forsa boot liu. Nee duni hau apela ba hotu-hotu atu korije hahalok sira nee, mantein vijilansia no respeita ba kadeia komandu,” katak nia.
Tanba nee liafuan agradesimentu klean nian neebe nia dirije ba retaguarda silensioza husi ita nia forsa rua, família sira. Ba kaben, inan-no apoiu aman, no oan sira husi pessoal militár no polisial, espresa no agradesimentu klean ba pasiénsia, komprensaun, inkondisionál neebe hatudu durante auzénsia naruk husi ema néebe ita boot sira hadomi.
“Ita boot sira nia sakrifisiu nuudar parte integrante ida ba susesu seguransa nasionál nian. Mai ita hotu-hotu kontinua serbí ho onra, lealdade no aten-brani,” nia hakotu.
Entretantu observasaun STL iha terenu katak,iha ambitu enseramentu forsa tarefa konjunta PNTL ho F-FDTL nee partisipa husi Komandante Jerál PNTL Komisariu Jerál Polisia Henrique da Costa, Segundu Komandante Jerál PNTL Komisariu Polisia Pedro Belo ho ofisial superior F-FDTL no PNTL hamutuk ho Komandante PNTL Munisipiu sira ho Komandante Unidade husi PNTL no F-FDTL nian.
(jen)
