DILI, STLTIMORLESTE.com – FALINTIL-Forsa Defeza Timor Leste (F-FDTL) ho Komando Polísia Nasionál Timor Leste (PNTL) halo avalisaun servisu Forsa Tarefa Konjunta, durante fulan liman iha territoriu Timor Leste lao diak.
Nia dehan, Komando PNTL ho F-FDTL kumpri diretiva Governu nian neebe hasai iha rezolusaun Governu 44/ iha loron 12 fulan Setembru 2025 too semana dahuluk inisiu fulan Janeiru 2026, lao diak no kontroladu.
“Maibe buat neebe ami nota iha treinu, durante servisu forsa Tarefa Konjunta hamutuk, bainhira Primeiru Ministru (PM), Kayrala Xanana Gusmão hasoru malu ho Prezidente Republika Jose Ramos Horta foin lalais nee, informa kona-ba situasaun seguransa iha Territóriu Timor Leste, durante fulan lima iha kazu krime balun akontese, maibe pas ho estabilidade iha tinan 2025 too 2026 nee lao hakmatek, entaun susesu ida nee laos ba PNTL ho F-FDTL nian, maibe ba ita tomak kontribuisaun mak situasaun lao diak nee,” hatete Xefe Estadu Maiór F-FDTL, Brigadeiro Jenerál José da Costa Soares “Trix” ba jornalista sira hafoin remata enkontru Avalisaun Forsa Tarefa Konjunta PNTL ho F-FDTL iha Sentru Formasaun Polísia (SFP) Komoro, Dili, Segunda (12/01/2026).
Nia fundamenta, durante avalisaun Komando PNTL ho F-FDTL kontinua servisu hamutuk garante estabilidade ho hakmatek iha territoriu Timor Leste, tanba nee husu sidadaun hotu, bainhira iha problema ruma akontese koopera malu hodi rezolve.
Iha fatin hanesan, Komandante Jerál Polisia Nasional Timor Leste (PNTL), Komisariu Jerál Polísia Henrique da Costa informa, buat prinsipal neebe mak iha PNTL ho F-FDTL servisu kompleta malu, maibe ida diak sei halo servisu iha nia instituisaun PNTL ba iha seguransa no F-FDTL ba iha Defeza, maibe ba interese nasaun nian nafatin halo koordenasaun servisu hodi mantein pas no estabilidade iha TL.
“Hanesan saida mak ohin Brigadeiro Jenerál hateten ona, susesu ida nee laos ba PNTL ho F-FDTL mesak, maibe matoridade kontribuisaun husi joven sira too inan aman ita konsege garante estabilidade iha serimonia loron boot no selebrasaun natál no tinan foun 2026 lao diak, entaun ita mantein ho ida nee, iha buat balun la diak nafatin koalia ita nia povu hodi buka solusaun, tanba susesu ida nee ita hotu nian,” nia afirma.
(jen)
