DILI, STLTIMORLESTE.com – Governu liu husi Komando FALINTIL-Forsa Defeza Timor Leste (F-FDTL) realiza serimonia retiru ida hamutuk ho Veteranu Reformadu no Rezerva sira, hodi koalia kona-ba situasaun aktualidade nomos problema neebe veteranus sira hasoru.
“Dader ida ohin too agora ita iha atividade neebe importante, neebe mak organizadu husi Komando F-FDTL nian kona-ba retiru ida hamutuk ho veteranus para atu koalia oituan situasaun aktualidade nomos koalia ituan kona-ba problema neebe akontese,” dehan Ministru Defeza (MD), Donaciano da Costa Gomes “Pedro Klamar Fuik” ba jornalista sira iha Sentru Instrusaun Komandante, Nicolau Lobato (CICNL), Metinaro, Kinta (6/03/2025).
Nia dehan, iha serimonia retiru nee mos iha orador nain tolu mak Ministru Defeza (MD), Donaciano da Costa Gomes “Pedro Klamar Fuik” Jeneral Taur Matan Ruak nomos Jeneral Lere Ana Timor.
“Hau koalia kona-ba oinsa mak pioneiros da Libertação Timor Leste neebe ita bolu Veteranus, oinsa mak sira nia kontribuisaun ba prosesu Libertasaun Nasional, depois Jeneral Taur Matan Rua koalia kona-ba oinsa mak kria unidade iha ita nia komunidade Veteranus, hanesan mos ita nia sosiedade Jeral,” nia tenik.
Iha Serimonia retiru nee mos Ministru Defeza nee koalia kona-ba pioneiros da Libertação Nacional, koalia veteranus hanesan sirkul de vida ida, wainhira atu too iha veteranu liu husi periodu vida ida hanesan joven, nia fo nia tempu tomak iha nia vida ba institusaun ida ou ba organisasaun ida, sira nia sakrifísiu fo servisu hotu-hotu para bele defende objetivu ida no defende hakarak komun.
Iha fatin hanesan, Xefe Estadu Maior Jeneral FALINTIL-Forsa Defeza Timor Leste (F-FDTL), Tenente Jeneral Domingos Raul “Falur Rate Laek” hatete, objetivu atividade nee ohin enkontru fali ho veteranu sira, veteranus sira neebe uluk terus hamutuk no luta hamutuk, atu konta fali istoria sira nee hanesan moral ida ba veteranus sira.
“Veteranu des mobilizadu mos iha nee hotu, sira reformadu sira mos iha nee hotu, nomos ativu mos iha nee hotu, ita haree sira neebe uluk iha ailaran sira nee mos iha nee hotu, hanesan Lospalos, Baukau, Likisa, Aileu, Manatuto, nomos munisipiu sira seluk,” nia deklara.
Nunee mos Eis Militar Agusto Tara Araújo agrades ba Ministeriu Defeza hamutuk ho Komando F-FDTL iha inisiativa diak bolu veteranu sira mai para hodi konsulta veteranus sira nia hanoin ba oin nian.
(jen)
