DILI, STLTIMORLESTE.com – Komando FALINTIL-Forsa Defeza Timor Leste (F-FDTL) liu husi Unidade Apoiu Servisu, ohin realiza ezersísiu lao ain ho distansia kilometru rua nulu resin ida (21), husi Fatuahi too baze Unidade Apoiu Servisu (UAS) Metinaro.
“Atividade ida ohin dader ami halao nee, bolu dehan ezersísiu Marsa Forsada kada tinan, ita nia militar sira sempre realiza, aleinde nee mos hola parte iha ami Unidade Apoiu Servisu nia matrix planeamentu kada tinan, neebe ohin mak ami nia Unidade realiza marsa ida nee,” hatete Komandante Unidade Apoiu Servisu (UAS), Major Infantaria, Horácio dos Santos ba jornalista sira iha Metinaro, Sesta (28/03/2025).
Nia esplika, objetivu prinsipal husi ezersísiu lao ain ida nee mak iha vertentes tolu.
“Ami konsidera, primeiru, ami hakarak teste kapasidade protindaun militar sira nian, ita persiza estadu fiziku forsas sira nian nomos sira nia mentalidade, abilidade no matenek, ida nee ita halo wainhira estadu atribui misaun ruma ba Forsas Armadas atraves husi ami nia Komando, ami unidade ida nee prontu ona para atu asumi misaun neebe ami simu husi Komando, ida seluk mak halo familiarijasaun ho komunidade lokal sira, maibe importante liu mak familiarija ho terenu, oinsa ami nia soldadu sira bele konhese zona sira nee, ida seluk ami halo hodi refleksaun ba Jornada FALINTIL sira nian, tanba ida nee mak ami Unidade Apoiu Servisu hatudu ba povu Timor Leste katak ami prontu ona kumpri kualker misaun saida deit mak iha ita nia rai,” nia informa.
Nia deklara, total ba militar sira neebe ohin lao ain nee hamutuk 105 mak halo ezersísiu ida nee no sira iha efetivu liu ida nee.
” Ami nia membru balu halo hela seguransa iha Unidade no balu kumpri hela misaun, ami sira iha nee mak ohin halo ezersísiu ida nee,” nia hatutan.
Entretantu ezersísiu ida nee hahu husi Fatuahi no termina iha baze Unidade Apoiu Servisu (UAS) Metinaro ho distansia 21 kilometru.
(jen)
