DILI, STLTIMORLESTE.com – Xefe Estadu Maior Jeneral FALINTIL-Forsa Defeza Timor Leste (F-FDTL), Tenente Jeneral Domingos Raul “Falur Rate Laek” hatete, Komando F-FDTL iha planu sei halo reforma ba veteranu nain 80 resin, neebe agora daudaun sei ativa iha instituisaun F-FDTL iha ambitu komemorasaun loron FALINTIL 20 Agostu ba dala 50 tinan nee.
Nia dehan, daudaun nee tuir baze dadus Komando F-FDTL nian iha veteranus ativu neebe sei halo funsaun iha instituisaun F-FDTL nain 80.
“Sim, sira nee ba ona reforma maibe sira laos reforma deit hanesan nee, Estadu tenke trata sira ho diak. Tanba nee Governu liu husi Ministru Defeza hatoo ona proposta lei ida hodi halo alterasaun ba Estatutu militar, nunee atu bele dignifika veteranus sira neebe ativu iha instituisaun F-FDTL no proposta nee aprova ona iha Konselhu Ministru, ita sei halo reforma,” dehan Tenente Jeneral Domingos Raul “Falur Rate Laek” ba jornalista sira iha Kuartel Jeneral F-FDTL Fatuhada, Dili, Sesta (25/04/2025).
Nia esplika, veteranu sira neebe sei ativu iha instituisaun F-FDTL fahe ba klasifikasaun luta ba libertasaun nasional, balun iha tinan 2, balun iha kontribuisaun ba luta 8a14, 15a19 no 4a7.
“Lei nee iha neeba sita mos kriteriu balun konaba sira nia direitu sira karik sira atu ba reforma, no ita sei tau matan ba ida nee nafatin para sira labele sente katak laiha dignifikasaun ba sira. Tanba iha lei foun nee hateten hotu sira nia pensaun no saida mak sira sei halo. Prosesu administrativu ba ida nee lao hela,” nia deklara.
Entretantu Ministru Defeza, Donaciano do Rosário da Costa Gomes “Pedro Klamar Fuik” infroma, iha loron 20 Marsu tinan 2025 aprezenta proposta alterasaun ba estatutu militar hodi dignifika veteranus sira neebe agora daudaun sei ativa iha instituisaun F-FDTL, nunee konsellu Ministru aseita no halo aprovasaun.
(jen)
