DILI, STLTIMORLESTE.com – Komando FALINTIL-Forsa Defeza Timor Leste (F-FDTL) selebra Aniversariu Unidade Apoiu Servisu (UAS) ba dala 23.
Iha diskursu Xefe Estadu Maior F-FDTL, Brigadeiru Jenerál José da Costa Soares “TRIX” hateten, ida nee hanesan istoria boot ida ba dezenvolvimentu Forsas Armadas tomak, liu-liu Unidade Apoiu Servisu (UAS) hanesan fuan ba Forsas Armadas iha F-FDTL nia laran.
“Haksolok tebes hau diriji ita boot sira ohin partisipa iha serimónia solene ida nee, ohin marka loron moris UAS nian bá dala 23, momentu ida nee laos deit selebra tinan servisu nian, rekonhese ba evolusaun ohin kontinua no rejilensia ba Unidade ida nee nian, esensial ba ita nia Forsa Defeza ohin hau temi uluk, hahu ho kiik oan ho naran FLU, ohin loron mai too iha FAG,” hatete Xefe Estadu Maior FALINTIL-Forsa Defeza Timor Leste (F-FDTL), Brigadeiru Jenerál José da Costa Soares “TRIX” ba jornalista sira iha Metinaro, Sesta (12/10/2025).
Nia esplika, istória husi unidade reflete nia Nasaun Joven, iha tinan 2002 bainhira Timor Leste hetan indepedensia, hahu moris unidade lojistika ida Forsa FLU mak ohin temi, harii atu garante militár sira iha nesesariu atu kumpri sira nia misaun ho diak.
“Ita hein katak iha tinan 20 resin sentru ida nee bele transfomra fali bá ensinu baziku no hau husu ba Forsa Apoiu Jeral no Unidade Apoiu Servisu (UAS) ba oin bele prioritija imi nia servisu kona-ba saida mak bele haburas ita nia kampu sira neebe oras nee daudaun hahu ona servisu iha ita nia rai doben Manatuto,” nia Informa.
Iha fatin hanesan, Komandante Unidade Apoiu Servisu (UAS) Major Horácio Baptista dos Santos deklara, onra boot no urgulhu tebes, loron ida nee Komando F-FDTL bele selebra aniversáriu Unidade Apoiu no Serbisu (UAS) nian.
“Loron ida nee momentu espesiál, marka importante ida tan ba ita hotu neebe dedika enerjia no esforsu tomak atu fo garantia ba ita nia misaun hodi kumpri ho diak tebe-tebes, ho integridade no unidade,” nia esplika.
Nia informa, haree ba trajetória neebe hakat liu mai, imposivel atu la reflete kona-ba dezafiu sira neebe bele supera, vitoria hirak neebe konkista hamutuk no liu tan buat, hirak nee hotu mak kompromisu inkansável (la hatene kole) husi membru idak-idak iha unidade ida nee. Unidade ida neebe iha nia trajetória, nia halo pilar fundamental, esensiál ba operasões hotu neebe depende idak-idak nia servisu.
“Maske dala barak, permanese ka rai hela deit mak marjen vizibilidade. ikus mai ita mak ema neebe opera iha bastidor. Maibe, presizamente iha fatin sira nee mak ita hetan forsa, hetan ita nia determisaun no ita nia propózitu,” nia hatutan.
Nia koalia, komemora dala ida tan istória tinan 23 ba ezistensia unidade ida nee, no hanoin mos dezafiu sira,” ita hasoru hamutuk no lisaun sira neebe ita aprende. Kada obstaklu neebe ita hakat liu halo ita forte liu tan, reziliente liu tan no preparadu hodi lao ba futuru. Kada tinan foun ita hafoun kompromisu ho diak liu tan, no hadiak bei-beik ho aperfeisoamentu tuir ita nia abilidade, tanba ita hatene katak, iha ambiente dinámiku neebe ita opera, adaptasaun no inovasaun nee importante tebes,” nia argumenta.
Nunee nia agradese ba idak-idak nia dedikasaun no profesionalizmu iha funsaun sira neebe idak-idak dezempeña.
“Hau hatene katak ita nia misaun dala barak silénsioza, izije sakrifisiu no esforsu loro-loron, maibe hau hatene katak ho empeñu ida nee mak halo ita sai unidade ida neebe esepsional, hetan respeitu no forte,” katak nia.
Entretantu observasaun STL iha terenu, partisipa iha serimónia aniversariu loron Unidade Apoiu Servisu nian mak hanesan Xefe Estadu Maior F-FDTL Brigadeiro Jenerál José da Costa Soares ‘TRIX’, APA Metinaro , Koronel Amico, aman Veteranus sira, Komandante Komponente Aéreo Koronel Helder da Costa, Komandante Forsa Apoiu Jerál Tenente Koronel João Bosco Ximenes, Reprejentante Komandante Komponente Naval, Reprejentante Komandante Komponente Terrestre, Komandante Unidade Polisia Militár Tenente Koronel Mateus de Jesus, Reprejentante Komandante Unidade FALINTIL, Komandante PNTL Aileu, Komandante PNTL Manatuto, Xefe Divijaun sira husi Kuartel Jenerál, Adidos Defesa sira, Asesor Internasionál sira, Ofisiais Sarjentus no Prasas UAS nian inklui mos Família Militár UAS nian.
Jornalista: Jeniche da Costa
Editor: Xisto Mendonça
