DILI, STLTIMORLESTE.com – Komando FALINTIL – Forsa Defeza Timor Leste (F-FDTL) tenta halo ona investigasaun ba membru Forsa Armada nain 5 husi Komponente Naval neebe mak hetan asidente iha Oekusi foin lalais nee.
Xefe Estadu Maiór F-FDTL, Brigadeiro Jenerál José da Costa Soares ‘TRIX’ informa, membru F-FDTL neebe hetan asidente nee agora dadauk balun kondisaun rekopera, no fila-fali ona ba uma ka iha postu, no balu mak kontinua konsulta ba sira nia saude.
“Komando tenta ona para investiga profundo, para aban baiñrua nee rezultadu oinsa karik, komando sei tenta fo sansaun ruma ba sira,” hatete nia ba jornalista sira iha Unidade Apoiu Servisu Metinaro, Segunda (25/08/2025).
Nia tenik, prosesu investigasaun lao hela, Komando orientál ona sira husi parte justisa iha ona terenu, para bele investiga no rekolha evidensia ka faktus sira ligadu ba asidente refere.
“Ita hotu hein, tanba sei iha prosesu investigasaun nia laran, tanba nee iha prosesu investigasaun nee konklui mak sei bele hatene motivu ka kauza lo-loos ba asidente nee, tanba saida,” nia esplika.
Nia informa, too agora komando seidauk simu relatoriu preleminariu ligadu ba asidente refere, tanba prosesu investigasaun sei lao hela iha terenu.
“Hau seiduak hatene, tanba nee mak hau haruka tiha ona, ita nia parte investigasaun sira. Hau atu koalia arbiru nee labele, ita kaer lai bukti mak ita foin bele koalia,” nia deklara.
Entertantu Membru soldadu nain-ualu husi F-FDTL Komponente nlNaval Oébau Rejiaun Administrativa espesial Oé-Kussi Ambeno (RAEOA), Kinta foin lalais nee hetan asidente ho kareta patrolamentu, bainhira viagen halao patrollamentu ba Citrana suku Bene-Ufe Sub-Rejiaun Nitibe.
Bainhira viagen patrolementu nee, foin too area Uthau-Foo suku Suni-Ufe, roda oin kuak no kareta monu ba rai-naruk hodi rezulta nain-tolu kanek todan no nain lima kanek kaman.
Hafoin asidente nee akontese, servisu ambulansia too kedas fatin akontesementu hodi transfere membru hirak nee ba sala emergensia Hospital referal Oékusi (HRO) hodi halo tratamentu intensivu.
(jen)
