DILI, STLTIMORLESTE.com – Komando Polisia Nasonal Timor Leste (PNTL) Munisípiu Dili sei la tolera membru Polisia Tranzitu neebe involve iha kazu dezentendimentu ho komunidade iha area Bidau akontese iha loron Tersa foin lalais sai viral iha media sosial.
Nia dehan, komando PNTL Munisípiu Dili promete sei loke prosesu investigasaun ba kazu refere, hodi bele prosesa tuir lei neebe vigor iha Timor Leste (TL).
“Kazu ida neebe akontese iha Bidau-Masaur involve ita nía Polisia Tranzitu feto ida neebe halo asaltu iha Bidaun Masaur. Kazu nee dala ruma publiku sira mos kestiona makaas, maibe Komando PNTL Munisipiu sei la tolera membru Polisia Tranzitu neebe involve iha kazu dezentendimentu ho komunidade”, hatete Komandante PNTL Munisipiu Dili, Superientendente Xefe Polisia Orlando Gomes ba jornalista sira iha Komando PNTL Munisípiu Dili, Kinta feira (12/06/2025).
Nia esplika, kazu dezentendimentu nee entre familia ho familia, tanba diskute malu kona-ba rai, maibe tanba involve ho Polisia Tranzitu halo publiku kestiona makaas no sai viral iha media sosial.
“Hau hakarak atualiza katak, primeiru kazu nee familiar kona-ba rai, entaun diskute malu entre bin ho alin”, nia dehan.
Nia tenik, maibe depois akontese ida nee, Komando Munisípiu Dili hetan informasaun husi komunidade sira no Komando orienta kedas polisia patrulhamentu postu eskuadra Kristu Rei tun kedas ba fatin refere.
Nunee, Polisia patrulhamentu eskuadra Kristu Rei tun kedas fatin neeba foti kedas sira lori ba Eskuadra Dom Aleixu, hodi halo identifikasaun no prosesu
“Ohin ita koordena nafatin ho ita nia prokurador, sira foti suspeitu sira neebe mak ita haree viral iha media sosial iha video nee. Ita foti sira halo identifikasaun, depois ita detein, tanba laiha ema ida iha lei nia leten, ema hotu-hotu iha lei nia okos”, nia esplika.
Tanba nee, ba sidadaun sira tantu polisia sira komete krimi, Komando PNTL sei la tolera, maibe levanta kedas ba prosesu kriminal nian.
“Neebe se deit mak komete krimi, ita halo prosesu, tantu polisia ita halo prosesu, tuir krimi neebe nia iha. Maske iha kazu nee membru Polisia Tranzitu nee uza sivil, tanba ita koalia kona-ba asaun krimi, se mak involve iha asaun krimi, ita tenke halo asaun prosesu,” katak nia.
Komandante Munisípiu Dili nee mos orienta ona parte polisia investigasaun nian hodi bele investiga membru polisia inklui Ofisial Polisia Suku (OPS) neebe iha kazu dezentendimentu nee la halo atuasaun, maibé haree deit.
“Ita hotu-hotu akompanha no haree iha video, saida mak akontese iha terenu, ita nia polisia sira iha neeba, neebe mak halo atuasaun. Ita orienta ita nía propost sira atu bele halo xamada urjenti ba polisia neebe mak iha terenu, tanba servisu tenke ho profisional para halo atendimentu diak ba publiku,” nia koalia.
Nia deklara, bainhira mosu kazu dezentendimentu ruma entre komunidade sira, kuandu polisia ninia prezensa iha neebe la mosu tan ona violensia iha fatin akontesimentu.
“Maibe ho ida nee komando sei foti medidas, sei bolu no sei halo investiga hodi hatene lolos, depois mak komando sei foti medidas ruma,” nia informa.
Ho kazu nee Komandante Munisípiu Dili nee konsidera katak, ho involvimentu husi Polisia Tranzitu nee nuudar aktu responsavel pesoal nian, tanba nee krimi tenke asumi responsavel, no komando akompanha ninia prosesu sira.
“Tan nee, agora daudaun foti sira halo identifikasaun, depois mak ba detein iha sela, tanba ita detein ba suspeitu sira neebe halo asaun krimi,” nia argumenta.
Iha fatin ketak, Akademista UNTL, Adérito da Silva deklara, membru PNTL ida mak involve ona ba kazu krimi nee tenke prosesa tuir lei neebe vigor iha nasaun RDTL.
“Membru PNTL tenke fo ezemplu diak ba ita nia sidadaun sira, laos ita boot mos ba baku tan ferik ida too monu ba rai, pior liu nia too desmaia iha fatin akontesimentu, ita baku ema raan sai no too monu ba rai nee krimi ona, hau hanoin Komando PNTL labele fo tolera ba nia tenke prosesu tuir lei nee mak ita iha,” nia afirma.
(jen)
