DILI, STLTIMORLESTE.com – Relasiona ho preokupasaun publiku kona-ba engarrafamentu neebe kada loron sempre akontese beibeik iha kapitál Dili no rekursu Polísia Tranzitu neebe mínimu koloka hodi kontrola movimentu transporte iha estrada.
Komandante PNTL Munisípiu Dili, Superintendente Xefe Polísia Orlando Gomes informa, Komando Munisipiu Dili koloka Polísia Tranzitu Ofisial Suku sira iha dader hodi kontrola movimentu transpote.
“Ita liga ho ita nia kapital Dili, motor no kareta barak, tanba nee Komando Munisipiu Dili dader koloka Tranzitu, Ofisial Suku sira, Paspol no Eskuadra sira koloka iha fati-fatin atu nunee kontrola movimentu trasporte, kuandu mosu engarrafamentu sira bele halo intervein kedas. Depois liu ida nee sira OPS mos ba halo sira nia servisu, Eskuadra mos ba atende sira nia servisu, banhira meudia ita nia Tranzitu mesak mak ita koloka iha fatin neeba,” hatete Komandante PNTL Munisípiu Dili, Superintendente Xefe Polísia Orlando Gomes ba jornalista sira iha Eskuadra Polísia Dom Aleixo, Kinta (12/02/2026).
Nia esplika, rekursu Polísia Tranzitu limitadu, nunee koloka sira ba pontu neebe hamosu engarrafamentu makaas nee no sira ofisiáis seluk ba halo atividade seluk.
“Maibe Komando Munisipiu Dili nafatin jere rekursu nee atu nunee ita koloka fatin sira neebe mosu engarrafamentu para hamenus engarrafamentuu neebe mak iha,” nia deklara.
Nia mos orienta ona Xefe Tranzitu Dili atu jere rekursu tranzitu hodi koloka iha fatin neebe sempre mosu engarrafamentu, tanba engarrafamentu nee laos deit iha dader, meudia no loraik engarrafamentu nee mosu kualker tempu.
“Ho ida nee mak ita fo ordem ona ba seksaun Tranzitu para koloka membru ba iha fatin neebe mak sempre mosu engarrafamentu no tempu badak mos ita sei apoiu tan ita nia membru balu ba iha tranzitu para haforsa tan para movimentu nee lao ho diak,” nia informa.
Nia esplika, membru tranzitu balu moras no balu idade avansadu ona, tanba nee rekursu iha seksaun tranzitu la sufisiente.
“Tuir lo-loos rekursu sufisiente hela tanba ita nia membru Tranzitu sira balu moras no balu idade avansadu, tanba nee mak ita buka atu haforsa tan membru balu ba Tranzitu para organiza diak Kapital Dili nee hodi hamenus engarrafamentu iha fatin-fatin,” nia deklara.
Komandante PNTL Munisípiu Dili afirma, kada postu Komando koloka membru Tranzitu minímu nain tolu, balu koloka membru nain rua tanba balu halo atividade seluk.
(jen)
