DILI, STLTIMORLESTE.com – Komandante Jeral Polisia Nasional Timor Leste (PNTL), Komisariu Jeral Polisia Henrique da Costa, ho Segundu Komandante Jeral PNTL, Komisariu Polísia Pedro Belo ho ofisial Superior PNTL halo avalisaun ba susesu asegura manifestasaun ho dalan promove dialogu entre Estudante Universitariu Timor Leste (EUTL) ho Parlamentu Nasional (PN).
Liafuan nee haktuir husi Komandante Jeral PNTL, Komisariu Jeral Polísia Henrique da Costa liu husi inkontru iha Komando Jeral PNTL, Kinta (18/09/2025).
Nia dehan, manifestasaun nee organiza husi EUTL, envolve sosiadade sivil hasoru orgaun soberanu PN, hahu iha 15 too 17 Setembru tinan 2025 mosu anarkismu balun rezulta membru PNTL nain 8, kanek ida ain tohar. Daudaun nee parte Departamentu Klínika Saúde PNTL halo kordenasaun ho Hospital Nasional Guidu Valadares (HNGV), hodi halo tratamentu saude.
“Durante ita haree manifestasaun loron tolu mosu anarkismu halo autoridade seguransa PNTL ho manifestante sira balun tenke kanek no tohar, maibe esperitu PNTL kontinua halo protesaun asegura seguransa ho susesu promove dialogu entre EUTL ho PN konsege hetan solusaun kansela sosa kareta foun no halakon lei pensaun vilatisia,” nia esplika.
Nia informa, maske autoridade seguransa PNTL hetan kanek no tohar halo atuasaun dala ruma manifestante sira la gosta, maibe ida nee mak seguransa halo atuasaun bazeia ba regra. Bainhira mosu asaun violensia, maibe PNTL konsege promove dialogu entre EUTL ho PN too hetan solusaun diak.
Entertantu iha enkontru ba avaliasaun nee lidera direta husi Komandante Jerál PNTL, Komisariu Jerál Polísia Henrique da Costa ho Segundu Komandante Jerál PNTL, Komisariu Polísia Pedro Belo hamutuk ho ofisial susperior PNTL sira iha Kuartel Jeral PNTL Kaikoli.
Jornalista: Jeniche da Costa
Editora: Domingas Gomes
