DILI, STLTIMORLESTE.com – Governu liu husi Polisia Nasional Timor Leste (PNTL) enkotru ho Xefe Suku Kaikoli hamutuk ho advogadu fo hanoin ba komunidade uma kain haat neebe sei hela iha Edifisiu PNTL Kaikoli nian, tanba nee husu atu muda para halao konstrusaun Kuartel Jeral PNTL.
Nia dehan, ohin planeamentu PNTL nian halo kominikasaun ho Xefe Suku Kaikoli, Postu Administrativu Vera Cruz, Munisípiu Dili, ho advogadu kona-ba rai neebe mak daudaun nee atu harii Kuatel Jeral PNTL nian neebe komunidade sei hela.
“Ita ohin koalia hamutuk ho sira para bele hetan ninia solusaun, nunee ita bele muda sai komunidade sira neebe mak hela iha oin nee hodi ita bele uza, liu-liu kompanhia bele uza oin mobiliza sasan tama sai hodi kontinua halo konstrusaun ba Kuartel Jeral PNTL, tanba nee ohin ita koalia ho Xefe Suku Kaikoli ho Advogadu depois ida nee mak sira fila ba koalia ho komunidade afetadu sira neebe seidauk iha solusaun, tanba ita husu ba sira atu koalia fila fali ho uma kain haat nee, depois sira sei mai aprezenta fila-fali mai Komando, depois ita sei kontinua ba Ministeriu Justisa,” hatete Komandante Jerál Polísia Nasional Timor Leste (PNTL), Komisariu Jerál Polísia Henrique da Costa ba jornalista sira iha nia knaar fatin Komando Jeral PNTL Dili, Tersa (06/01/2025).
Nia tenik, Komando PNTL husu ba Komunidade katak, PNTL presiza duni fatin nee atu halo konstrusaun ba Kuartel Jeral PNTL nian, depois iha mos entrada husi area neeba ninia.
“Ita husu komunidade apoiu Governu no apoiu mos PNTL, tanba ita persiza duni fatin nee, tanba nee ohin ita tur hamutuk fo hanoin ba Xefe Suku Kaikoli ho Advogadu atu nunee sira ba sei halo fila-fali komunikasaun ba ita nian komunidade uma kain haat nee, depois sira sei aprezenta fila-fali mai PNTL, sei kontinua fila-fali ba Ministeriu Justisa, em prinsipiu sira iha hanoin diak katak sira prontu para atu koopera, tanba rai neeba PNTL presiza,” nia deklara.
Iha fatin hanesan, Xefe Suku Kaikoli, Postu Administrativu Vera Cruz, Munisípiu Dili, Hipolito Marques Sarmento esplika,
“Ami mai hasoru malu ho Komandante Jeral PNTL, tanba bolu hau ho Advogadu atu halo negosiasaun kona-ba rai, ohin iha buat ruma mak ami rona, komunidade sira hakarak rai, rai iha, komunidade sira hakarak osan, osan iha, tanba nee ami ohin rona ona depois ami sei fila-fali ba komunidade no rona took komunidade nia hakarak nee saida, depois ami rua sei fila-fali mai aprezenta rezultadu,” nia deklara.
Nia koalia, Komando PNTL mos lakohi komunidade sira sai vitima, tanba nee mak negosiasaun kleur ho komunidade, tanba seidauk iha solusaun.
“Ohin ami rona rai iha fatin tolu, Hera, Tibar no Metinaro, sei lakohi rai entaun osan, maibe osan nee ita seidauk hatene, ita sei ba koalia ho ita nia komunidade lai, sira hakarak ida neebe,” nia afirma.
Jornalista: Jeniche da Costa
