DILI, STLTIMORLESTE.com – Komando Polisia Nasional Timor Leste (PNTL) implementa Servisu Polisiamentu Komunitariu iha Munisipiu, hamutuk ho Servisu Investigasaun Kriminal halao atividade hodi sensibilizasaun ba eskola sira iha Munisipiu 13 inklui RAEOA.
Komandante Jerál Polisia Nasional Timor Leste (PNTL), Komisariu Jeral Polisia, Henrique da Costa dehan, Servisu Polisiamentu Komunitariu ho mos Servisu Investigasaun Kriminal halao atividade prevensaun ka vizita ba iha eskola sira, halao ba too iha munisípiu sira neebe mak servisu hamutuk ho Komando Munisípiu sira hodi halo sensibilizasaun ba eskola sira.
“Iha Munisípiu Dili laran rasik, iha semana kotuk hahu ona implementa atividade polisia vizita ba iha eskola, nuudar meus ida ita bele prevene krimi no mos bele pasa informasaun ba iha ita nian estudante sira,” hatete Komisariu Jeral Polisia, Henrique liu husi nia diskursu iha knaar fatin Komando Jeral PNTL, Dili, Segunda (10/03/2025).
Nia esplika, meus seluk atividade neebe Polisiamentu Komunitariu nian Komando PNTL mos realiza enkontru ho Embaixada sira. “Iha semana rua kotuk ita realiza enkontru ho Embaixada Xina nia neebe mak envolve sira nian asosiasaun hotu. Intensaun ita nian katak, atu informa ba sira kona-ba situasaun seguransa, maibe ita mos husu ba sira para apoiu sira nian membru sira hodi prevene mos ba iha krimi,” nia deklara.
(jen)
