DILI, STLTIMORLESTE.com – Komando Polisia Nasional Timor Leste (PNTL) realiza enkontru kortejia ho Ministeriu Interior (MI), hanesan fo atensaun ida ba membru PNTL hodi servisu diak liu tan ba povu no nasaun ida nee.
Komisariu hatoo obrigadu ba MI, Francisco Guterres, tanba uza nia tempu tenke halo vizita mai iha Kuartel Jeneral PNTL hodi halao enkontru.
“Ida nee sai hanesan ondra ida ba ami, sai hanesan atensaun ida ba ami atu nunee nafatin orienta ami halo servisu ho diak,” hatete Komandante Jerál Polisia Nasional Timor Leste (PNTL), Komisariu Jeral Polisia, Henrique da Costa iha nia knaar fatin Komando Jeral PNTL, Dili, Segunda (10/03/2025).
Nia esplika, situasaun seguransa iha teritoriu laran tomak lao diak, tanba Komando Munisipiu sira, Unidade sira, Diresaun Tranzitu Rodoviariu Nasional sira no membru PNTL hotu-hotu halao nian knaar masimu tebes, mezmu iha buat balu neebe sempre akontese, maibé ida nee la fo impaktu ba iha situasaun jeral servisu membru PNTL idak-idak nian.
Mezmu iha fulan Janeiru too Fevereiru ita rejistu kazu hamutuk 184, maibé nafatin ita nia membru sira buka meus oinsa para bele prevene krimi iha fulan hira tuir mai ka ba futuru ninia,” nia tenik.
Nia esplika, krimi neebe akontese maioria mak ofensa integridade fizika neebe mak rejista iha munisípiu sira hotu, tuir fila -fali numeru segundu mak maus tratus ka kazu ba iha violasaun domestika ninian neebe mos rejista aas iha munisípiu hotu.
(jen)
