DILI, STLTIMORLESTE.com – Komando Polisia Nasional Timor Leste (PNTL) halao enkotru hodi trasa planu ba operasaun ba seguransa jogu Komunidade Nasaun Lian Portuges (CPLP – siglaportuguê) ba dala XII neebe halo iha Timor Leste, hahu ona loron 17-26 fulan Julhu tinan nee.
Nia dehan, Komando Polísia Nasionál Timor Leste (PNTL) hahu konvoka enkontru Xefe Departamentu, Diretór Diresaun Komando Jerál inklui Komandante Unidade sira ba preparasauin jogu CPLP ba dala XII neebe halo iha Timor Leste, hahu iha loron 17-26 fulan Julhu tinan nee.
“Komando Operasaun PNTL halao enkontru Prelemináriu ba aprezentasaun planu operasaun ne’ebé mak sei halao hodi asegura ba ita nia jogu CPLP neebe sei akontese iha dia 17 ate 26 fulan Julhu nee,” hatete Komandante Komando Operasaun Nasionál PNTL, Superinendente Xefe Polísia Justinho Menezes ba jornalista sira iha Komando PNTL Jerál Kaikoli, Dili, Kuarta nee (02/07/2025).
Nia tenik, ida nee nuudar enkontru primeiru husi komandante sira hotu atu fo informasaun ka ideia sira hodi elebora planu diak liu ba eventu internasional ida nee. No Jogu hamutuk 12 mai husi modalidade ualu (8) ba joven sira ho idade 16 ba kraik.
“Komando Operasaun PNTL hakarak informa ba hotu-hotu, liu-liu autoridade lokal sira, responsabilidade komunitáriu sira, lider komunitariu sira atu infoma ba sidadaun sira, joven sira kada bairu, aldeia, suku para sira mos hatene atu kontribui paz no estabilidade,” nia esplika.
Justinho deklara, PNTL sei pro ativu iha eventu internasionál nee, tanba hetan partisipasaun másimu hodi nasaun Membru CPLP nian, durante loron-sanulu-resin ida.
“Orientasaun ba Komando Munisípiu no Unidade sira mak komanda direta ba sira nia membru neebe mak sei halao seguransa ba Tarefas sira iha terenu ka eventu sira direta ka indireta,” nia informa.
Nia hatutan, eventu jogu desportivu internasionál nee Komando PNTL sei hatun membru sira ho másimu hodi asegura jogu CPLP nee lao diak.
“Tanba ita hatene katak asaun krimi sira mosu, ameasa sira sei mosu, ita trasa planu para ita bele halo atuasaun ho rigorozu. Polísia halo seguransa no apoiu husi ita nia Forsa Amigu sira liu-liu ita nia Forsa F-FDTL,” nia konklui.
Entretantu iha enkontru preliminariu ba prepasaun planu seguransa ba jogu desportu CPLP nia nee lidera husi Segundu Komandante Jeral PNTL, Komisariu Polisia Pedro Belo hamutuk ho Komandante Komando Operasaun PNTL, Superintendente Xefe Polisia Justinho Menezes no Komando Supervizaun sira, Komandante PNTL Munisipiu Dili no Komandante Komando Unidade tolu hanesan UEP, UPM no UPF ho Komandante Sentru Formasaun Polisia, Xefe Departamento, Diretor Diresaun no Xefe Gabinete iha kuartel Jeral PNTL hodi rona orientasaun kona-ba Planu operasaun hodi garante seguransa iha jogu desportu CPLP, tanba Timor Leste hanesan uma nain.
Depois iha Jogu Desportu CPLP nee sei realiza iha loron 17 too 26 Julhu iha Timor Leste neebe sei partisipa husi nasaun CPLP, tanba nee Komando PNTL hahu halao enkontru Preparasaun Planu asegura seguransa iha eventu internasional Jogu Desportu CPLP iha Timor Leste.
(jen)
