DILI, STLTIMORLESTE.com – Komando Polisia Nasional Timor Leste (PNTL) presiza halao investigasaun ba membru ka autor neebe deskonfia fo kilat ba sidadaun estranjeiru hodi trenu tiru, tanba kontra lei.
Kestaun nee hatoo husi Peskizador Asia Justisa and Rights (AJAR), Inocencio de Jesus Xavier ba jornalista sira, iha nia knaar fatin Farol, Dili, Sesta (03/10/2025).
Nia hatete, membru CSP neebe fo kilat ba sidadaun estranjeiru ida hodi trenu tiru halimar ida nee violasaun neebe grave, tanba nee husu Komando presiza loke investigasaun no bele halakon mos nia profisaun nuudar membru PNTL.
Maibe horiseik Portavos Komando PNTl hasai ona deklarasaun katak, suspende ona nia loke prosesu investigasaun nia bele too iha sansaun displinar, nomos bele lakon nia profisaun nuudar Polisia.
“Loke prosesu investigasaun bele too sesaun displinar nomos bele halakon nia profisaun nuudar Polisia tanba nee violasaun grave ba estadu, tanba arma nee ema kaer deir tudik ida dehan arma Branka kriminaliza agora autoridade Polisia ida neebe hatene didiak katak, ida nee labele maibe nia autoriza ema estranjeiru ida kaer tan ita nia arma estadu ida nee problema, neebe hau hanoin komando tenke kontrola didiak ajente neebe nakar oituan fo kilat ema,” dehan Peskizador AJAR nee.
Nia hatutan, tenke loke mos prosesu displinar fo kriminalizasaun ba nia, tanba hahalok nee violasaun boot ida ba uza arma nee.
Nunee mos Visi Diretor HAK, Antonino de Limas ezije Komando PNTL, tenke halo investigasaun klean ba membru fo kila tba ema estranjeiru.
“Ita ezije ba polisia tenke halo duni investigasaun ba pesoal nee, buat nebee halo ita preokupa nee mak nee Polisia loloos hatene regra sira hatene oinsa utiliza armas nee tuir nia objetivu se sira fasilita fo ba ema estranjeiru hodi halo treinu nee mos ita preokupa, buat neebe prezidente konsellu Ministru koalia nee bele Indika ba aktu sira nee,” dehan Antonino.
Nia dehan, membru polisia ida mak utiliza armas la tuir ona regra ida nee bele fo mos oportunidade ba ema seluk bele halo tuir, liu husi sosa kilat ilegal sira tanba nee ezije atu halo investigasaun klean.
Aleinde nee Superintendente Polísia, João Belo dos Reis hatete, Komando Jeral PNTL foti ona medida hasoru Membru CPS nee, no halo ona Suspensaun durante loron 30 nia laran.
Komando sei husu responsabilidade ba nia (Diretór SNI) tanba saida mak nia halo, tanba saida mak nia iha neeba.
Tanba nee membru Corpu Seguransa Pesoal (CSP) neebe fó Arma ba Xineza, Komando fo ona medida no halo ona suspensaun ba nia hodi hein ba prosesu investigasaun disiplinar nian.
Jornalista: Emerenciana Pinto
Editora: Carme Ximenes
