DILI, STLTIMORLESTE.com – Prezidente Republika (PR), Jose Ramos Horta iha programa Dapur ba Povu, oinsa mak oferese hahan nutritivu ba labarik no inan isin rua sira atu kombate malnutrisaun iha Timor Leste (TL).
Programa Dapur ba Povu lansa iha Dezembru 2022, inisiativa ida husi Prezidente Republika Jose Ramos Horta, hodi kombate malnutrisaun iha Timor Leste. Misaun mak atu fornese hahan nutritivu ba labarik sira, inan isin rua sira no inan sira neebe fo susu.
Atualmente estabelese dapur lima iha fatin oin-oin, dapur dahuluk mak iha Dili (iha resintu Prezidensial neebe hanaran Kantína Matak), neebe serve hahan 380 loron-loron exetu fin de.semana dapur daruak mak iha Komoro ( Labeh nia eskola ba Labalik sira) atende labarik 130 loron lima iha semana ida, Bidau Santa Ana nee fo han labarik 133 loron lima iha semana ida. Dapur dahaat mak iha Hera, fornese ai-haan liu 250 semana ida dala tolu no dapur dalimak mak iha Oekusi, fo han maizumenus labarik 300-350 loron lima iha semana ida.
Nia hatete, Dapur ba Povu fo ona hahan ba labarik liu 1,000 no kuaze 100% husi hahan sira hotu-hotu hetan finansiamentu liu husi orsamentu prezidensial.
Programa fo han ba Hera jere husi Sra. Aguida Pinto Pereira neebe apoia ona inisiativa sira hodi oferese nia kintal atu uza ba Prezidente Dapur ba Povu. Iha Oekusi, programa hahan nee ezekuta husi Madre Dominikana sira, neebe koordena hela inisiativa nee. Enkuantu iha Dili halao husi Organizasaun Naun Lukrativu Arcoiris Timor Leste, iha asegura prosesu fo han ba membru komunidade alvu sira, halao tuir matadalan neebe hatuur ona husi Prezidente. Inisiativa ida nee hetan supervizaun jeral husi Bella Galhos nuudar koordenador prinsipal husi Dapur Prezidente ba Povu no mos lidera Unidade Empoderamentu Ekonomiku Feto (EEF) husi Prezidensia.
Ida nee hanesan domin simples husi Prezidente Jose Ramos Horta hasoru labarik sira neebe hetan apoiu tomak husi Primeiru Ministru Kay Rala Xanana Gusmão.
Iha nia lia menon Prezidente hatete, “Hau labele salva labarik hotu-hotu iha nasaun ida nee, maibe hau bele salva balun atu asegura katak sira iha asesu ba hahan nutritivu sira. Hau hein katak sira seluk sei hetan inspirasaun no apoia inisiativa sira situasaun malnutrisaun no kestaun kresimentu neebe ita nia oan sira hasoru iha rai ida nee, tenke trata ho laran tomak hodi halakon dala ida ba hotu,” dehan PR Horta liuhusi Komunikadu neebe STL asesu husi Pajina PR, Kinta (03/04/2025).
Inisiativa loke Programa Dapur ba Povu lansa iha Dezembru 2022, inisiativa ida husi Prezidente Republika Jose Ramos Horta, hodi kombate malnutrisaun iha Timor Leste.
(eme)
