BAUKAU, STLTIMORLESTE.com – Kombatentes Libertasaun Nasional neebe rejistu naran iha tinan 2009 husi Munisipiu Baukau hamutuk 8.620 mak submete ona karta reklamasaun iha Konselhu Kombatentes Libertasaun Nasional (CCLN) Munisipiu Baukau.
Prezidente CCLN Munisipiu Baukau, Fernando “Beredu’u” Gusmão esplika, inisiu MAKLN anunsiu ba kombatente sira iha teritoriu nasional neebe la satisfas ho atribuisaun dedikasaun servisu ba kombatentes sira nian iha lista edital 2025 husi kombatente neebe rejistu iha tinan 2009, bele halo reklamasaun durante loron 60 iha sede CCLN Munisipal sira.
Nunee faze primeiru KKLN Munisipiu Baukau simu reklamasaun husi Kombatentes sira hahu iha loron 15 Janeiru too loron 15 Fevereiru tinan nee hamutuk 1.500, no faze segundu too loron 15 Marsu tinan nee simu reklamasaun hamutuk 7.120.
“Agora iha ami nia liman aban lori ba nasional hamutuk 7.120, maibe sura ho ida hatama uluk nee iha 8.620, neebe mak aban ami lori ba nasional,” hateten Beredu’u ba jornalista sira iha nia knaar fatin iha Vila Antiga, Segunda, (17/03/2025)
Beredu’u sublina, karta reklamasaun neebe CCLN Baukau simu husi kombatente sira, daudaun asegura iha edifisiu CCLN Munisipal no tuir planu iha loron 18 Marsu 2025 (aban) sei entrega ba CCLN Nasional hodi relata ba ministeriu kompetente hodi fo solusaun.
Nia fundamenta, loron 60 neebe sura husi loron 15 Janeiru too loron 15 Marsu nee la sufisiente ba kombatentes sira iha Baukau, tanba numeru taka sai iha lista edital, kombatentes neebe hetan dedikasaun eskluzivu 3a7 no 0a3 iha Baukau liu rihun 10, maibe foin simu deit reklamasaun rihun 8 resin no barak seidauk submete iha Sede CCLN Munisipal, tanba kestaun distansia dook.
“Tempu nee la sufisiente, tanba barak mak seidauk hatama, neebe ami nia hakarak atu estende, maibe ami ba nasional mak koalia took, iha orientasaun entaun ami lao tuir,” hateten Beredu’u.
Prezidente CCLN Baukau nee argumenta, relasiona loron 60 neebe la sufisiente ba kombatentes sira hatama karta reklamasaun, tanba balu seidauk, nunee iha loron 18 Marsu bainhira CCLN Baukau submete ona dadus 8.620 ba nasional, sei konfirma Ministeriu Asuntu Kombatentes Libertasaun Nasional hodi fo solusaun ba asuntu refere, tanba kombatentes barak mak iha Baukau seidauk hatama karta reklamasaun.
Nia informa, husi total reklamasaun refere maioria husi kombatentes neebe naran taka sai iha lista edital ho dedikasaun eskluzivu 3a7 no 0a3, nunee la satisfas halo reklamasaun atu hetan fali dedikasaun eskluzivu 8a14.
“Hotu-hotu hakarak 8a14, laiha buat ida sira halo ba, maibe orsida Estadu mak deside, CCLN Munisipal laiha diskriminasaun, se ami halo diskriminasaun karik sira mai rejistu ami mak iha ai-laran, se mak servisu no se mak la servisu, maibe ita hotu nia sakrifisiu mak ita ukun aan,” Beredu’u akresenta
Tuir Beredu’u katak, CCLN Munisipal iha kompetensia fasilita deit simu reklamasaun husi kombatentes hodi submete ba nasional, maibe deside atu kombatentes sira husi dedikasaun eskluzivu hanesan 3a7 no 0a3 ba fali 8a14 nee depende ba ekipa validasaun, tanba atu hetan 8a14 prezisa komprovas hanesan uluk iha tempu okupasaun hetan kastigu no seluk tan tuir lei difini ona.
Maibe hanesan Timoroan konsidera malu simu reklamasaun sira hodi prosesa ba iha nasional, hafoin ekipa tetu tuir lei neebe estabelese ona, tanba Timor hetan ukun aan, husi Timoroan hotu nia sakrifisiu.
Aleinde simu karta reklamasaun, CCLN Baukau mos simu kontestasaun 20 resin husi veteranus sira ba Kombatentes neebe naran taka sai iha lista edital 2025, tanba konsidera falsifika dadus hodi hetan dedikasaun eskluzivu 8a14.
“Agora iha ami nia liman iha 20 hanesan nee ou liu, tanba ami seidauk konfere, maibe seluk sei mai tan, tanba agora telefone deit ami atu kanselha ida nee,” informa Beredu’u
Entretantu lista edital 2025 ba kombatentes sira neebe rejistu iha tinan 2009 husi Munisipiu Baukau hamutuk rihun 10 resin, kompostu dedikasaun eskluzivu ho 24 anos, 15a19 no 8a14 hamutuk 319, no hirak neebe halo reklamasaun husi dedikasaun eskluzivu 3a7 hamutuk nain 4.401, enkuantu 0a3 rejistu hamutuk nain 5.991.
(tom)
