BAUKAU, STLTIMORLESTE.com – Konselhu Veteranus Munisipiu Baukau simu ona kontestasaun balu husi kombatente rihun 9 resin, neebe hetan dedikasaun servisu 3a7 no menus tinan 3.
Haktuir Sekretariu Jeral Konselhu Munisipal Kombatente Libertasaun Nasional (KMKLN) Baukau, Manuel ‘Alari’ da Costa Soares ba STL iha Vila Antiga, Segunda (20/01/2025).
“Sira agora kontesta hela, tanba numeru 3a7 no menus 3 nee kuaze rihun 9 resin, neebe nia kontestasaun nee too iha postu 6 besik too fulan 1 ou 2 hanesan nee,” hateten nia.
Kontestasaun neebe simu maioria hetan kontribuisaun masimu iha prosesu luta ba ukun rasik aan, maibe hafoin lista taka sai, barak mak ho deit grau 3a7 inklui menus tinan 3, nunee parte Konselhu Veteranus Munisipal simu kontestasaun hodi submete ba nasional hadia hikas.
Mezmu Ministeriu Asuntu Kombatente Libertasaun Nasional fo sai simu kontestasaun durante loron 60, maibe Konselhu Veteranus Nasional aprova loron 90 ba simu kontestasaun, tanba numeru barak.
Iha sorin seluk, Familia kombatentes Alcina Ana Ximenes neebe re apresia ho politika Governu, tanba bele fo espasu ba familia kombatente sira atu halo kontestasaun, maibe konsidera tempu mak limitadu.
“Hau mai kontesta hau nia aman nia, tanba nia mate ona, sente triste, tanba ohin dader kedas mai, maibe too agora seidauk hetan formulariu, tanba iha Baukau ema barak mak halo kontestasaun,” katak nia.
Nia rekomenda ba ekipa nasional, bainhira simu ona kontestasaun husi kombatente no familia kombatente sira faze atu verifika ho onestidade.
(EST 2)
