BAUKAU, STLTIMORLESTE.com – Konselhu Kombatentes Munisipiu Baukau agradese ba manifestante sira, tanba pragrama sosa karreta foun kansela ona, maibe husu labele halo asaun krime liu husi tuda fatuk hodi estraga fasilidade estadu.
Sekretariu Jeral Konselhu Kombatentes Munisipiu Baukau, Manuel da Costa Soare “Alari” agradese ba manifestante sira neebe hasoru ona planu Parlamentu Nasional kona-ba sosa kareta foun unidade 65 ba deputadu sira, tanba liu husi manifestasaun planu sosa karreta foun kansela ona neebe ofisialmente deklara husi deputadu sira iha loron 15 Setembru 2025.
“Primeiru ita agradese ba asaun ida nee, maibe ita husu pensaun vitalisia nee mos buat ida importante tebes tenke luta para Estadu haree halo amandamentu ba ida nee,” hateten “Alari” ba STL iha Vila Nov,a Baukau, Tersa (16/09/2025).
Tanba tuir nia manifestasaun neebe realiza husi estudante universitariu sira hasoru Parlamentu Nasional iha loron 15 Setembru 2025 konsege hatudu sinal kansela ba sosa karreta foun, maibe husu manifestante sira labele hatudu asaun krime no estraga fasilidade estadu, tanba bainhira fasilidade estadu hetan estragus husi rezultadu manifestasaun nian sei fo impaktu hikas ba orsamentu Estadu.
Nunee asaun manifestasaun la prezisa tuda no seluk tan, maibe agradese ba ba asaun manifestasaun neebe kansela ona planu sosa karreta foun no husu hatudu disiplina hodi ba oin la rezulta ema balun hetan kanek no mate iha asaun manifestasaun refere.
“Alari” mos aseita planu manifestante sira nian kona-ba hasoru Parlamentu Nasional atu halao Pensaun Vitalisia no reduz viajem kada Ministeriu sira neebe halo viajem ho delegasaun volume boot, tanba gastu deit orsamentu estadu, maibe laiha rezultadu.
“Kada Ministeriu halo viajem servisu ida kareta ida too tolu loos ona, dala ruma viajem ida too kareta too tolu nulu nee efetivu ga lae nee gastu osan hirak mak nee, neebe hau hanoin gastu sira hanesan nee prezisa haree fila fali deside jestor ida diak halo poupansa ba ita nia osan, ita labele tebe rai loron ruma mina maran, labele halo nasaun nee ba fali kotuk, mai ita hamutuk fo apoiu lori povu ba objetivu prosperu,” Alari fundamenta.
Xefe Suku Gurusa, Filomeno Mendonça orgulho no agradese ba manifestante sira, tanba liu husi manifestasaun refere kansela ona planu sosa karreta foun hamutuk unidade 65.
“Ita mos la aseita Parlamentu sosa karreta 65, tanba tuir ita nia haree karreta neebe sira uza agora daudaun kondisaun sei diak, nusa la tau orsamentu ba saude edukasaun, tanba iha postu ambulansia laiha falta aimoruk, fasilidade eskola meza kadeira laiha nusa la sosa ida nee hakarak loos Prado tinan 5 sempre sosa,” katak Filomeno
Lideransa Komunitariu nee fo apoiu tomak ba manifestante sira neebe daudaun kontinua organiza malu halo manifestasaun hasoru Parlamentu Nasional no husu ejize mos halakon lei pensaun vitalisia, tanba povu barak sei moris iha linha pobreza.
“Lei pensaun vitalisia laiha nee diak liu tan, tanba depois de sira nia mandatu iha Parlamentu neeba hotu sira halimar deit iha uma fula-fulan hetan pensaun vitalisia, entaun ami sujere lei pensaun vitalisia halakon, se Na’i Ulun sira kaer nafatin pensaun vitalisia nee susar ba ita nia ema sira neebe agora maioria moris iha kiak nia laran,” dehan nia.
Lei pensaun vitalisia neebe jornalista STL asesu previstu iha Dekretu Lei Nº. 1/ 2007 loron 18 Janeiru. Lei ida nee atu responde ba art. 22º husi lei nº. 5/ 2004 kona-ba pensaun ba deputadu sira neebe nia mandatu hotu ona. Sira neebe la sai ona deputadu, fulan-fulan sei simu osan (100%) hanesan deit ho deputadu sira neebe ativu hela.
Jornalista: Tomas Reis
Editora: Carme Ximenes
