DILI, STLTIMORLESTE.com – Komemora Aniversariu FALINTIL ba dala 50, Prezidente Republika (PR) hatete, husu ema hotu hakruuk ba luta nain sira neebe fo aan tomak hodi lori rai nee ba hetan ukun rasik aan.
Prezidente Republika Jose Ramos Horta hatoo lia hirak nee liu husi nia mensajen ba loron FALINTIL ba dala 50 iha Palasiu Prezidensial Nikolao Lobato, Bairo Pite, Tersa (05/08/2025).
Prezidente Republika hatete, selebra aniversariu FALINTIL ba dala 50 iha loron importante nee hanoin mos eroi sira nia luta neebe la sente tauk hodi luta makaas hodi lori rai nee ba hetan ukun rasik aan, tanba nee ema hotu presiza hakruuk ba eroi no veteranus sira hotu.
“Bainhira ita halibur hamutuk iha rai doben ida nee atu selebra loron FALINTIL liu-liu hanoin ba eroi sira, eroi sira hanesan Nikolao Lobato neebe mate iha kombate loron sira nee ita hanoin mos ba Timoroan mane feto joven ferik katuas kombatente naun kombatente neebe mate iha rai laran, no hau mos hanoin beibeik ba sakrifisiu neebe ita nia povu halo, no joventude halo lubuk ida lakon sira nia vida, sira nia joventude, sira la kompleta sira nia estudu, sira neebe mate iha santa Kruz no mate iha fatin barak-barak too ohin seidauk hetan sira nia ruin, hau la fiar sei hetan loron ruma,” katak PR Horta.
Prezidente Republika mos admira tebes elementu sira neebe kombate luta 24 anos, ida nee mak halo Prezidente Republika admira tebes.
“Sira luta barak iha mundu nee tinan 24 iha liur hau la tuur la toba iha neebe hau estuda klean movimemtu oin-oin iha mundu, no hau hatete hau admira tebes ita nia luta nee, hau admira eroi sira hanesan maun boot Xanana ho Taur matan Ruak ou Lere Anan Timur, sira la.hatene bainhira mak luta nee remata fo vitoria,” katak PR Horta.
Prezidente Republika hatete, durante luta iha ai laran luta nain sira la hatene bainhira mak luta nee bele hetan vitoria no vitoria nee iha duni ka lae, maibe ikus sira fiar iha duni vitoria.
“Dala ruma hahan laiha sira han buat hotu hotu neebe sira bele tau sira nia ibun, tinan ba tinan dala ruma bee moos laiha sira hemu bee foer mota laran nia ou bee kolam sira la rende, veteranus sira nee merese duni,” katak nia.
Xefe Estadu hatete, durante luta veteranus sira hasoru dezafiu no terus oin oin maibe sira la husu buat ida, sira ho objetivu mak mate ka moris hakarak lori rai nee hetan ukun rasik aan, tanba nee sira merese duni hetan rekonhesimentu.
Sira nia luta ba Patria, Povu no Nasaun, no laos husu buat ida sira hatudu omildade simples, tanba nee nafatin tau matan memoria ba sira neebe mate no kontinua tau matan ba sira neebe sei moris, veteranus sira, FALINTIL sira.
“Balun ita sei haluha, haluha laos estadu haluha maibe tanba balun sira mesak los iha foho dala ruma hau hasoru ida iha Atsabe ka iha neebe hau hasoru dehan nee veteranus uluk luta nia hamutuk ho maun Xanana agora nia nunee deit, laos nia ema taka odamatan ba nia, maibe tanba nia rasik la hatene nia aan oinsa atu besik instituisaun sira nee,” katak PR Horta.
Xefe Estadu hatete, Estadu ida nee hahu kedas lideransa iha 2007 tanba prosesu nee hahu iha 2007 Governu AMP mak halo esforsu barak identifika veteranus sira hotu-hotu rihun ba rihun rekonhesimentu ba sira depois bainhira osan komesa tama hahu tama iha Timor Leste husi Bayu Undang husi Fundu Petrolifeiru Governu komesa tulun veteranus sira, orsamentu ba veteranus sira boot tebes komparativa iha mundu.
Xefe Estadu hatete, rekonhese veteranus sira halo ho fuan laos veteranus sira mak ezije maibe estadu halo duni ida nee para rekonhese veteranus sira.
“Mensajen hau nia mak nee, hakruk ba veteranus sira hakruuk ba FALINTIL, F-FDTL sira, veteranus sira neebe luta 24 anos hau la temi naran tanba temi naran ida ka rua la temi, ba sira hotu-hotu ke hau hanoin signifikadu liu ita selebra loron FALINTIL ita tenke hanoin sira neebe sei moris, no dala ruma haluha tiha sira hakruuk ba sira neebe lakon sira nia vida,” hakotu PR Horta.
(eme)
