DILI, STLTIMORLESTE.com – Prezidensia Republika hamutuk ho Sekretariu Estadu ba Iguakdade (SEI) organiza workshop kona-ba pratika igualdade jeneru no saude.
Xefe Kaza Sivil Prezidensia Republika, Jesuina Maria Ferreira Gomes hatete, ida nee inisiativa husi Prezidensia Republika nia atu komemora loron nasional feto ba dala 49 neebe liu ona, komisaun organizadora Prezidensia Republika liu husi rekursu humanu organiza workhop ida nee konvida SEI nomos sira husi Ministeriu Saude ho nia tema mak “pratika igualdade jeneru saude hodi kontribui ba produtividade”.
“Neemak ohin hau koalia oituan konaba igualdade jeneru oinsa liga ho saude, saude nee ita koalia konaba saude fizika, nomos saude mental. Kuandu igualdade jeneru nee diak ona otomatikamente produtividade nee sei aumenta ou sei diak liu tan iha serbisu fatin,” dehan nia liu husi diskursu iha Palasiu Prezidensial Nicolau Lobato Bairo Pite, Kinta (05/11/2025).
Nia hatete, workshop nee koalia kona-ba igualdade jeneru no saude iha Prezidensia investe ba produtividade.
Nunee mos Diretor Nasional Politika Igualdade Jeneru husi SEI, Abilio Barreto hatete, tanba sa asuntu igualdade jeneru nee sai hanesan asuntu politika nasional ida oinsa mak bele promove iha Timor Leste.
“Iha nia tema hatete, implementasaun politika abordajen integradu jeneru iha Timor Leste nia baze mak ohin Xefe Kaza Sivil hatete ona katak, liga kedas ho enkuadramentu legal neebe fo dalan no biban fo espasu oinsa para bele promove politika igualdade jeneru no inkluzaun iha ita nia rai rasik,” dehan nia.
Nia hatete, iha enkuadramentu legal ba promosaun igualdade jeneru no inkluzaun sosial haree husi konstituisaun Republika Xefe Kasa Sivil foka ba artigu 16, 17 KRDTL, neebe koalia konaba igualdade no universaldade hatete katak ema hotu hotu iha direitu neebe hanesan iha lei nia oin, nee konsagra iha konstituisaun Republika.
Maibe iha artigu 5 mos koalia konaba assuntu igualdade jeneru no 16 mos koalia oinsa partisipasaun ema hotu hotu nia iha area ekonomia politika sosiu kultural inklui vida moris familia tanba nee mak ejistensia SEI baze mak iha Konstituisaun Republika rasik.
Jornalista: Emerenciana Pinto
Editora: Domingas Gomes
